Qostanaı óńirinde jol sapasyna qatysty 280 kemshilik tirkeldi

ASTANA. KAZINFORM – Qostanaı oblysynyń joldarynda sapaǵa qatysty 280-nen astam buzýshylyq anyqtaldy. Eskertýlerdiń basym bóligi jol-qurylys materıaldarynyń standartqa saı kelmeýine baılanysty, dep habarlaıdy Kazinform.

Bul týraly Ulttyq jol aktıvteri sapasy ortalyǵynyń óńirlik fılıaly málimdedi. Vedomstvo dereginshe, zerthanalyq synamalardyń 2 241 taldaýynyń 387-si normatıvterge sáıkes kelmegen.

Osynyń saldarynan merdigerler óz esebinen qaıta jumys isteýge mindetteldi. Joıylǵan kemshilikterdiń quny 340 mln teńgeden asty.

— Bizdiń ortalyq respýblıkalyq mańyzy bar joldarmen qatar, oblystyq, aýdandyq jáne qalalyq joldardy da tekseredi. Sonymen birge jol jabynyna dıagnostıka júrgizemiz. Barlyq anyqtalǵan aqaý hattamaǵa tirkeledi, merdigerge ony joıý merzimi belgilenedi. Eger jumystar oryndalmasa, tıisti shara qabyldaý úshin arhıtektýra jáne qala qurylysy basqarmasyna hat joldaımyz, — dedi fılıal dırektory Abylaıhan Alshynbaev.

Eń kóp taraǵan kemshilikter:
• tyǵyzdyq koeffıtsıentiniń standartqa saı bolmaýy;
• geometrııalyq parametrlerdiń aýytqýy;
• jabyn betiniń aqaýlary.

Ortalyq málimetinshe, sońǵy bes jylda merdiger uıymdar anyqtalǵan kemshilikterdi jalpy 1,6 mlrd teńge kóleminde joıǵan.

Buǵan deıin Almaty — Qostanaı baǵytynda jańa «Talgo» poıyzy júretini habarlanǵan bolatyn.