Qostanaı onkodıspanseriniń bas dárigeri para alǵany úshin sottaldy

QOSTANAI. QazAqparat - Qostanaı qalalyq №2 sotynyń úkimimen oblystyq onkologııalyq dıspanserdiń bas dárigeri Múslim Naýrzov kináli dep tanyldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.

M.Naýrzov aýyr qylmys (bir top adammen aldyn ala sóz baılasý arqyly iri kólemde para alǵan) jasady degen kúdikke ilingen bolatyn.

«Qostanaı qalasy №2 sotynyń úkimimen azamat N. QR QK 366-baby, 3-tarmaǵy, 4-bóligimen kináli dep tanyldy. Oǵan QR QK 55-babynyń 5, 6-tarmaqtary boıynsha tómengi shekti jaza taǵaıyndaldy. Sottalýshy qaýipsizdigi tómendetilgen qylmystyq-atqarý júıesi mekemesinde 4 jyl jazasyn óteıdi. Memlekettik qyzmette jumys isteý quqyǵynan ómir boıyna aıyryldy», - dep atap ótti oblystyq sottyń baspasóz qyzmetindegiler.

Osy úkimmen onyń orynbasary Dáýlet Bópejanov ta kináli dep tanylyp, oǵan 3 jyl bas bostandyǵynan aıyrý jazasy taǵaıyndaldy. Ol memlekettik qyzmette eńbek etý quqyǵynan ómir boıyna shettetildi. Úkim zańdy kúshine engen joq.