Qostanaı oqýshylary aýa raıyna baılanysty qashyqtan oqıdy
«Aýa raıy jaǵdaıynyń nasharlaýy: jeldiń kúsheıýi, qalyń qardyń túsýi jáne joldyń durys kórinbeýine baılanysty 2021 jyldyń 27 jeltoqsanynda Qostanaı qalasy mektepteriniń ekinshi aýysym oqýshylary qashyqtan oqytý formatyna aýystyrylady. Birinshi aýysymda oqıtyn balalar úshin sabaqtardy qysqartý usynylady», - delingen habarlamada.
Sondaı-aq, aýa raıynyń qalyptasqan jaǵdaıyna baılanysty júrgizýshiler men jaıaý júrginshilerge tártip saqshylary eskertý jasady.
«Jaýyn-shashynnyń mol túsýi jol qozǵalysyn qıyndatyp otyr. Osynyń barlyǵy kólik quraldarynyń qozǵalysyna keri áserin tıgizip, jol-kólik oqıǵalaryna ákelip soqtyrady. Osylaısha, Qostanaıdyń ózinde ǵana bir táýliktiń ishinde 30 jol-kólik oqıǵasy oryn alǵan. Osyǵan baılanysty júrgizýshiler men jaıaý júrginshilerge eskertý jasaımyz – jolda asa muqııat bolyńyzdar. Júrgizýshilerge úlken qashyqtyqtaǵy jolǵa shyǵýdan bas tartýyn suraımyz», - dep habarlady Qostanaı oblysy polıtsııa departamentinen.
Vedomstvo osyndaı kún raıynda kólik júrgizý stılin aýystyrý kerek ekenin eske saldy.
«Jaıaý júrginshiler, sizder de joldan ótý kezinde nemese jol jıegimen ótip bara jatqanda asa abaı bolyńyzdar. Júrgizýshiler men jaıaý júrginshilerge jol qozǵalysy erejelerin saqtaýyn suraımyz, sebebi bul – sizdiń ómirińiz ben densaýlyǵyńyz», - dep qorytyndylady PD-dan.
