Qostanaı obylysynyń aýyl turǵyndary maska tigip, tegin taratýda
QOSTANAI. QazAqparat – Qostanaı oblysy Amangeldi aýdanynyń turǵyndary betperdeler tigip, halyqqa taratýda, dep habarlaıdy QazAqparat.
Elde tótenshe jaǵdaı jarııalanǵannan keıin dárihanalarda medıtsınalyq maskalar tapshylyǵy sezilýde. Bul jaǵdaı oblystyń ońtústik aýdandaryn da aınalyp ótken joq. Osy oraıda Amangeldi aýdanynyń turǵyndary medıtsınalyq betperde tigip, halyqqa taratýda. Aýdan ákimi Ámirhan Asanovtyń usynysymen, jergilikti tiginshilikpen aınalysatyn kásipkerler betperde tigýdi qolǵa aldy. Qazir aýdanda 17 adam osyndaı medıtsınalyq betperde tigýmen aınalysýda. Olardyń arasynda grant utyp alǵan kásipkerler de bar. Tiginshiler qazir 2000-ǵa jýyq masqa daıyndady. Jalpy bir kúnde 1000-1500 betperde daıyndaýǵa qaýqarly. Máselen, Amangeldi aýylynyń turǵyny Jańagúl Hamzına eki kún ishinde 210, Danash Sultanova 187 betperde tikken. Keı betperdelerdiń baǵasy 100 teńgeden satylýda. Kóp balaly otbasylarǵa tegin beriledi. 
Gúlim Ǵıýazqyzy basqaratyn «Qalamqas» balabaqshasy ujymy tiginshileri de betperde tigip, halyqqa usynyp jatyr. Bul iske mádenıet salasynyń ókilderi de atsalysýda. Úrpek aýyldyq okrýgine qarasty Qosjan eldi mekeniniń kitaphanashysy Bıjamal Áýbákirova 80 danadan astam medıtsınalyq maska tigip, aýyl turǵyndaryna tegin taratty. Amantoǵaı, Aǵashtykól, Baıǵabyl, Qarasý aýyldary da bastamaǵa qoldaý bildirdi. «Eldegi tótenshe jaǵdaı kezinde bos otyrmaı, qolymyzdan kelgen kómegimizdi aıamaýǵa tyrysyp jatyrmyz. Kóp óńirde medıtsınalyq betperdeler jetpeı jatyr. Osy ýaqytta sál de bolsa, úles qossaq deımiz. Bul jumystardy jalǵastyra beremiz», - deıdi áýesqoı tiginshiler.
Qysyltaıań shaqta turǵyndarǵa járdem tıgizgen turǵyndarǵa Amangeldi aýdanynyń ákimdigi alǵysyn bildirdi.
Aıta keteıik, aýdanda arnaıy qurylǵan komıssııa músheleri adam kóp shoǵyrlanatyn oryndardy baqylaýǵa alǵan. Tótenshe jaǵdaıǵa baılanysty kezekshilik uıymdastyrylyp, saqtyq sharalaryna aıryqsha nazar aýdarylýda. Kóshede stýdent jastar men oqýshylardyń bos júrmeýi baqylaýǵa alynǵan. Aýdan ákimdigi, poshta, HQKO bólimsheleri, saýda oryndary antıseptıkalyq zattarmen tolyq qamtyldy.
