Qostanaı oblysynyń joldarynda qutqarý jumystary jalǵasýda
TJD bólimsheleri Qarasý, Amangeldi jáne Jitiqara aýdandarynyń aýmaǵynda, sondaı-aq Arqalyq qalasynyń mańynda 6 qutqarý operatsııasyna qatysty.
«26 naýryz kúngi saǵat 14:02-de Tótenshe jaǵdaılar departamentiniń qyzmetkerleri Jalǵystal aýylynan 25 shaqyrym jerdegi qystaqtan naýqasty Arqalyq qalasynyń aýrýhanasyna apardy. Sharýa qojalyǵynda jumys istegen 1967 jylǵy er adam shuǵyl medıtsınalyq kómekke muqtaj boldy», - dep túsindirdi vedomstvodan.
Sol kúni qutqarýshylar ıyǵynan jaraqat alǵan 2006 jylǵy balany tasymaldaý úshin Qostanaıdan Qarasý aýdany, Terekti aýylyna attandy. Saǵat 17:05-te naýqas bala Oktıabrskıı kentindegi aýrýhanaǵa jetkizildi.
«Tústen keıin qutqarýshylar Arqalyq-Derjavınsk tas jolynda turyp qalǵan 99 azamat, onyń ishinde 20 balaǵa kómek kórsetý úshin der kezinde jetti. Olardy jaqyn mańdaǵy eldi mekenderge apardy. Fýrmanovo aýylynda 50 adam jylytý pýnkti – jergilikti mektepke jáne týystarynyń úılerine, qalǵan 49-y Arqalyq qalasyna ornalastyryldy», - dep baıandady vedomstvodan.
Sondaı-aq saǵat 19:40-ta Qostanaı-Joldama tas jolyndaǵy Dámdi aýylynyń mańynda qar qursaýynan 14 adam qutqarylyp, Úshtoǵaı aýylyna jetkizildi, onyń ishinde 3 bala bolǵan.
Keıinirek qutqarýshylar Arqalyq-Amantoǵaı tas jolynyń Mırnoe aýyly mańyndaǵy ýchaskesinde qar qursaýynda qalǵan adamdarǵa kómek kórsetýge shyqty. Qutqarylǵan 57 adam 21:25-te Arqalyq qalasyna jetkizildi.
«Bes jolaýshy mingen jeńil kólik Jitiqara qalasynan 70 shaqyrym jerde oblystyq Jitiqara-Muqtykól jolynda turyp qaldy. Saǵat 23:00-de TJD qyzmetkerleri kólikti súırep joldyń tazartylǵan bóligine shyǵardy, sodan keıin qutqarylǵan azamattar qozǵalysyn ári qaraı jalǵastyra aldy», - dep túsindirdi departamentten.
Oblystyń Tótenshe jaǵdaılar departamenti aýa raıynyń qolaısyzdyǵynan jolda qalyp qoıǵan azamattardy ýaqytsha ornalastyrý úshin 255 tósek orny bar 9 jylý pýnktin daıyndady.
