Qostanaı oblysynyń úzdik úkimettik emes uıymdary anyqtaldy
Qostanaı oblysynda úkimettik emes sektorǵa qoldaý kúsheıip keledi. Qazirgi tańda aımaqta 951 ÚEU tirkelgen. Olardyń 82,2%-y turaqty jumys istep tur. Marat Júndibaev sektorda qyzmet etetin uıymdardyń kóp bolǵany durys ekenin jetkizdi
«Elimizdegi azamattyq sektor udaıy Elbasynyń nazarynda. Oǵan «Qazaqstannyń Azamattyq alıansy» qoǵamdyq qozǵalysynyń qurylýy dálel. Bul qozǵalys úkimettik emes uıymdarmen tikeleı qarym-qatynas alańyna aınaldy. Bir jyl buryn VІІІ Azamattyq forýmda Qazaqstannyń Tuńǵysh Prezıdenti Nursultan Nazarbaev «Úkimettik emes uıymdar ómir sapasyn arttyrýdyń draıverine aınalýy tıis» dep atap ótken bolatyn. Mamyr aıynda bizdiń óńirimizde Memleket basshysy Qasym-Jomart Toqaevtyń qatysýymen Qazaqstan jáne Reseı jastarynyń forýmy ótkenin bilesizder. Jáne osy úlken jıynda keler jyldy «Volonterler jyly» dep ataý usynyldy. Eń bastysy joba sapaly bolý kerek. Sońǵy úsh jylda ÚEU jobalaryn olardy memlekettik tapsyrys arqyly qarjylandyrý kólemi 2,5 esege artty. 2017 jyly 187 mıllıon teńgege 185 joba qarjylandyryldy. Bıyl bul soma jarty mıllıardqa jetip, 311 joba júzege asyrylýda. Buryn memlekettik tapsyrysty ishki saıasat basqarmasy ǵana júrgizip kelse, qazir 10 basqarma qolǵa aldy», - dedi Marat Júndibaev.
Ákim orynbasary aıtqandaı, 2011 jyly oblystyq densaýlyq saqtaý basqarmasynyń ǵımaratyn resýrstyq ortalyqtyń quzyryna berildi. Qazir munda onnan asa ÚEU qyzmet etip otyr.
Oblysymyzdaǵy talaı isterge bastama bolyp kele jatqan «Úmit-Nadejda» qoǵamdyq birlestiginiń qurylǵanyna 15 jylǵa jaqyndap qaldy. Ásirese, І, ІІ toptaǵy múgedekterdiń tirek-qozǵalý apparattaryna qol jetkizýine zor eńbek sińirip keledi. Jyl saıyn 35-40 kemtar janǵa osyndaı apparattar qajet eken. Táýligine 55-60 múgedek massaj, psıhologııalyq, zańdy keńester, trenıngter, trenajer zaldarynda jattyǵýlar, eńbekke baýlý, dáriger qaraýynan ótedi. Múgedek arbasyna tańylǵan talaı jandardyń memlekettik organdar arqyly kóptegen ótkir máseleleri sheshimin tabýda. Máselen, 2015 jyly jarymjan jandarǵa arnalyp qurylǵan «Raýan» qoǵamdyq birlestigi oblysymyzda alǵashqylardyń biri bolyp áleýmettik kásipkerlikti damytýdy qolǵa aldy. Onda múgedek jastar massaj, kovorkıng-ortalyqtan tegin qyzmet alyp, tigin, qolóner, aspazdyq, polıgrafııa, aǵash óńdeý qatarly kýrstardan ótýge múmkindigi bar. Nátıjesinde óńdeý jáne tigin tsehyna 8 adam jumysqa ornalasqan. Alaıda múgedekter úshin sheshimin kútken másele az emes.
«Qazirgi tańda Qostanaı, Rýdnyı, Arqalyq qalalary men Qostanaı aýdanynda ınva-taksı qyzmet etip kele jatyr. Bizdiń aýdandardaǵy ınva-taksıdiń sanyn kóbeıtý jóninde usynysymyz bar. Kezekte eki aýdan tur. Osy jaǵynan aımaq basshylyǵy kómek kórsetedi degen senimdemiz», – dedi «Úmit-Nadejda» qoǵamdyq birlestigi tóraǵasynyń orynbasary Arýna Jaqsaǵulova.
Oblys ákiminiń orynbasary bul usynysty qoldaıtynyn ári ony aımaq basshysyna jetkizetinin málimdedi.
Qamysty aýdanynyń Jaıylma eldi mekeninde 2013 jyly qurylǵan «Jaıylma» bastamashyl toby osy jyldar aralyǵynda birqatar ilkimdi jobalardy júzege asyryp úlgerdi. Shalǵaıdaǵy aýylda balalarǵa qyzmet kórsetetin «Búrkit» ortalyǵy ashylǵan. Onda túrli úıirmelermen qatar, pándik oıyndar men konkýrstar ótkizýge arnalǵan, tipti, sporttyq alańy, gazeti bar «Atameken» ıntellektýaldyq klýby qurylypǵan.
«Biz mektep mýzeıi, únemdeýshi jaryq berý, mektep ishinen gúlder men kókónis ósiretin jylyjaı qatarly jobalardy qolǵa alyp, oblystyq, óńirlik áleýmettik bastamalar jármeńkelerinde júldeli bolyp kelemiz. Byltyr «ZhasProject» jastar korpýsyn damytý jobasy boıynsha ulttyq kıimder tigetin «Óner» tigin tsehy men «Lıder» vıdeostýdııasyn ashtyq. Bıyl da óńirlik jármeńkede jeńimpaz bolyp otyrmyz. Júldege berilgen 150 myń teńgege kıiz úı jaraqtap, «Etnolager» jobasyn júzege asyrdyq. Munyń eń utymdy jeri – 10 kúnge lagerge kelgen balalar munda qazaqtyń tilin, dástúr-saltyn meńgerip ketip jatyr. Basqa aýdandardan keletin qonaqtardyń kóptiginen bir kıiz úı azdyq etýde. Sol sebepti, biz kelesi jármeńkede jobamyzdyń aýqymyn keńeıtsek degen oıdamyz», – dedi «Jaıylma» bastamashyl tobynyń jetekshisi Shymbat Aqbasova.
Azamattyq sektorǵa qoldaý retinde 2010 jyldan beri úzdik úkimettik emes uıymy baıqaýy ótkizilip keledi. Bıyl bul konkýrstyń aýqymy keńeıip otyr. Sebebi, belsendi bastamashyl jobalardy usynýshylardyń qatary artqan. Bıyl 7 atalym boıynsha 23 uıym men 8 bastamashyl toptan 31 ótinim kelip túsipti.
Sonymen, «Úzdik azamattyq bastamalar-2019» baıqaýynyń jeńimpazdary mynalar:
«Sportty damytý jáne salamatty ómir saltyn qalyptastyrý» nomınatsııasy – «Salamatty ult – Qostanaı» QB;
«Qazaqstan halqynyń birligin nyǵaıtý jáne qazaqstandyq patrıotızm men otbasy ınstıtýtyn nyǵaıtý» – «Synergy» ǵylymı-aǵartý ortalyǵy» QQ; «Mádenıet jáne tarıhty saqtaý» – «Qolóner» QQ;
«Áleýmettik az qamtylǵan azamattar tobynyń quqyǵyn qorǵaý» – «Ómir» múgedekter men múgedek balalardyń analar qoǵamy» – QB;
«Balalarmen jáne jastarmen jumys» – «Polıýs» balalar ortalyǵy» QB;
«Mádenıet jáne tarıhty saqtaý» – «Qazaqstannyń bıoalýantúrlilikti saqtaý assotsıatsııasy» respýblıkalyq QB Qostanaı oblystyq fılıaly; «Úzdik bastamashyl top» – «Jaıylma» bastamashyl toby.
