Qostanaı oblysynyń úzdik sportshylary anyqtaldy
QOSTANAI. QazAqparat – 2019 jyldyń qorytyndysy boıynsha Qostanaı oblysynyń úzdik sportshylary men jattyqtyrýshylaryn saltanatty marapattaý rásimi ótti, dep habarlaıdy QazAqparat.
Jyl úzdikterin marapattaý sharasyna oblys ákimi Arhımed Muhambetov qatysyp, jeńimpazdardy quttyqtady. Onyń sózinshe, 2,5 myńǵa jýyq sport nysanynyń arqasynda jappaı sportpen aınalysatyn halyqtyń úlesi 31,6%-ǵa jetti. Bıyl 30, onyń ishinde aýyldyq jerlerde 12 jańa sport alańy paıdalanýǵa berildi.
«Táýelsizdiktiń 28 jyly ishinde qanshama daryndy sportshylar tárbıelendi. Olardyń arasynda bizdiń jerlesterimiz, maqtan tutar aıaýly azamattarymyz bar. Búgin zalda Olımpıada chempıondary, álem chempıonattarynyń júldegerleri, ýnıversıada, azıada, ulttyq birinshilikterdiń jeńimpazdary otyr. Bıyl oblys sporty aıtýly jańalyqtarǵa toly boldy. Rýdnyı qalasynda memlekettik-jekeshelik áriptestik sheńberinde ınvestorlardyń bastamasy boıynsha «Fýtzal Arena» fıtnes ortalyǵynyń qurylysy bastaldy. Oblys ortalyǵynda 1 000 kórermen ornyna arnalǵan «Qostanaı» sport kesheni jáne 3 000 kórermen ornyna arnalǵan «Tobyl Arena» fýtbol maneji salyndy. 2 500 kórermenge arnalǵan Muz sport saraıy jáne 50 metrlik basseın ashylady. Boks mektebi ǵımaratynyń qurylysy bastaldy. Sonymen qatar shańǵy bazasy paıdalanýǵa beriledi», - dep atap ótti oblys basshysy.
Arhımed Muhambetov jyldyń úzdik sportshylary men bapkerlerine sertıfıkattar men baǵaly syılyqtar tapsyrdy. Úzdikter qatarynda grek-rım kúresinen QR halyqaralyq dárejedegi sport sheberi Tamerlan Shadýkaev, 2017-2019 jyldardaǵy Álem chempıonatynyń eki márte kúmis júldegeri, kıkboksıngten halyqaralyq dárejedegi sport sheberi Dıdar Tólebaev, Azııa rekordshysy, 2019 jylǵy Álem chempıony Qabyl Tursynaı, ústel tennısinen halyqaralyq dárejedegi sport sheberi Dúısenǵalı Ospanov, karate shınkıokýshınkaı boıynsha halyqaralyq dárejedegi sport sheberi. Azııa Chempıony Vladımır Artıýshınder bar.
