Qostanaı oblysynyń úzdik 10 sportshysy anyqtaldy
QOSTANAI. QazAqparat - Oblystyq dene shynyqtyrý jáne týrızm basqarmasy ótken jyldy qorytyndylap, úzdik sportshylarǵa qurmet kórsetti, dep habarlaıdy QazAqparat tilshisi.
Ótken jyl qostanaılyq sportshylar úshin jaman jyl bolǵan joq. Birqatar halyqaralyq, respýblıkalyq jarystarda jerlesterimiz qorjynǵa júldeni ýystap saldy. Jyl boıy kózge túsken júırikter jyl aıryǵynda laıyqty marapatqa ıe boldy.
2017 jyldyń úzdik on sportshysynyń kóshin konkımen syrǵanaýdan elimizdiń eńbek sińirgen sport sheberi Denıs Kýzın bastady. Odan keıingi orynda short-trekshi, halyqaralyq dárejedegi sport sheberi Anastasııa Krestova tur. Velosıpedshi Danııl Marýhın men shańǵyshy Vıtalıı Pervýhın úshin de ústimizdegi jyl oljaǵa toly boldy. Grek-rım kúresinen Tamerlan Shadýakevtyń aty ozdy. Ókinishke qaraı, bulardyń beseýi de Ońtústik Koreıada ótetin qysqy Olımpıadaǵa daıyndalyp jatqandyqtan saltanatty rásimge kele alǵan joq. 
Aıtpaqshy, bıyl alǵash ret on úzdik sportshynyń tizimine toǵyzqumalaqtan el chempıony, halyqaralyq dárejedegi sport sheberi Qymbat Nóserova endi.
«Bul men úshin úlken qýanyshty jaǵdaı. Oblystyń eń úzdik on sportshysynyń biri atansam, keıbir jetistikterim sep bolǵan shyǵar», - dedi Nóserova jýrnalıstermen suhbatynda.
Arbadaǵy bıden Álem chempıonatynyń qola júldegeri Malıka Muqtarova bul joly qos birdeı marapatqa ıe boldy. Oǵan halyqaralyq dárejedegi sport sheberiniń kýáligi saltanatty túrde tapsyryldy.
Ulttyq at sporty men qazaq kúresinen de birtalaı nátıjeli jarystar márege jetti. Jalpy, bıylǵy jyly oblys aýmaǵynda 243 birinshilik pen Kýbok jarysy, sondaı-aq, túrli sport boıynsha 30 shaqty el chempıonattary uıymdastyrylypty.
«Iá, jyl jarysqa toly boldy. Aldaǵy jyly da kóptegen sport básekeleri kútip tur. Oblysta kóptegen sport keshenderi ashyldy. Aldaǵy ýaqytta Qostanaıda 50 metrlik júzý basseıini paıdalanýǵa beriledi. 2500 orynǵa laıyqtalǵan onyń qurylysy 2018 jyly bastalady», - dedi oblystyq dene shynyqtyrý jáne týrızm basqarmasynyń basshysy Evgenıı Vılıams.
