Qostanaı oblysynyń úsh qalasy jaryqsyz, jylýsyz qaldy
QOSTANAI.QazAqparat – Aýa raıynyń kúrt qubylýyna baılanysty Qostanaı, Lısakov, Rýdnyı qalalarynda kommýnaldyq qyzmetter toqtady, dep habarlaıdy QazAqparat.
Oblys ákiminiń janyndaǵy arnaıy shtabtyń málimetine súıensek, qalalardaǵy kommýnaldyq qyzmetterdiń isten shyǵýy boran men qatty jeldiń saldarynan bolǵan. Ǵımarattar qırap, avtokólikter qar astynda qalǵan. Birneshe nysannyń jumysy toqtady.
«Qalalarda ortalyq jaryq, sý jáne jylý jelilerinde aqaý paıda boldy. Qostanaı qalasy elektr stantsııasynda apattyq jaǵdaı oryn alyp, birneshe jeli isten shyqty. Túsinistik tanytýlaryńyzdy suraımyz», - dep jazdy Shtab qyzmeti.
Saǵat 22.00 shamasynda Qostanaı jáne Rýdnyı qalalarynyń keı shaǵynaýdandarynda jaryq júıesi qosylǵan.
«Qurmetti Qostanaı qalasynyń turǵyndary! Aýa-raıynyń kúrt ózgerýine baılanysty, barlyq nysan menshiginiń basshylaryn óz qyzmetkerlerin jýyr ýaqytta jumystan bosatýyn suraımyz. Sonymen birge elektr men sýmen júıisiniń toqtaýyna túsinistikpen qarańyzdar. Barlyq kommýnaldyq qyzmetter kúsheıtilgen rejıminde jumys istep jatyr. Apat joıylǵan soń elektr men sý júıesi qalpyna keltiriledi. Qurmetti qala turǵyndary! Bárińiz úıde qalyńyzdar jáne syrtqa jolǵa shyqpańyzdar»,- dep jazdy Qostanaı qalasynyń ákimi Qaırat Ahmetov áleýmettik jelide.
Lısakov qalasy da biraz ýaqyt sýsyz jáne jylýsyz otyrýǵa májbúr boldy. Elektr qýaty jeldiń saldarynan tańerteń 09.00 shamasynda aǵytylǵan. «Lısakovskgorkommýnenergo» MKK bas dırektory Jeńis Mahambetovtiń aıtýynsha, qolaısyzdyqtar tań atqansha qalpyna keltiriledi.
