Qostanaı oblysynyń úsh aýdanynda 57 tonna astyq urlandy
QOSTANAI. QazAqparat - Qostanaı oblysynyń úsh aýdanynda 57 tonna astyq urlandy. Bul týraly oblystyq ІІD baspasóz qyzmetinde málim boldy, dep habarlaıdy QazAqparat.
30 tamyz kúni Naýryzym aýdanynyń bir JShS-inde 35 tonna astyqtyń jetpegeni belgili bolady. Seriktestik basshysy birden polıtsııaǵa júginedi.
«Tártip saqshylarynyń iz kesý sharalary boıynsha, uıymnyń 27 jastaǵy mehanızatory men 42 jastaǵy kúzetshi-baqylaýshysynyń 35 tonna bıdaı urlaǵany anyqtaldy. Keltirilgen zalal quny - 2 mıllıon teńge. Urlanǵan astyq JShS basshysyna qaıtaryldy, urlyq isi boıynsha sotqa deıingi tergeý jumystary júrip jatyr» - delingen ІІD baspasóz qyzmetiniń habarlamasynda.
Dál osyndaı qylmys Qamysty aýdanynda boldy. Polıtseıler 29 tamyz kúni 34 jastaǵy KamAZ júrgizýshisin toqtatady. Onyń tirkemesine 18 tonna bıdaı tıelipti. Keıin anyqtalǵandaı, astyq jaqyn mańdaǵy bir kásiporynnan urlanǵan. Shyǵyn quny - 900 myń teńge. Sondaı-aq, bul urlyqqa JShS tórt mehanızatordyń qatysy bolǵany anyqtaldy. Olar da qamaýda otyr. Sotqa deıingi tergeý sharalary jalǵasýda.
Qarabalyq aýdananynyń Beloglınov eldi mekeninde de zańbuzýshylyq isi tirkeldi. Tártip saqshylarynyń jedel-izdestirý sharalary barysynda bir uıymnyń 21 jastaǵy kólik júrgizýshisiniń 3,8 tonna astyq «arqalaǵany» belgili boldy. Bul fakti boıynsha da sotqa deıingi tergeý júrgizilmek.
Batyr Jolaıuly
