Qostanaı oblysynyń turǵyny úsh balasyn tastap ketken
QOSTANAI. QazAqparat - Qarabalyq aýdanynda úsh balasyn tastap, ishimdikke salynyp ketken áıel jazalanýy múmkin, dep habarlaıdy QazAqparat.
Kókek ana aýdan ortalyǵyndaǵy Gogol kóshesindegi úıinen shyǵyp ketken. Balalardyń jylaǵan daýsyn estigen kórshileri úıge kiredi. Úsh balanyń jalǵyz otyrǵanyn kórgen olar birden ıývenaldyq polıtsııaǵa habar bergen. Qyzýy kóterilip, aýyryp jatqan bes aılyq náreste aýdandyq ortalyq aýrýhanaǵa jetkizildi. Al bezbúırek ana balalaryn izdep, aýrýhanaǵa birneshe kúnnen soń bir-aq kelgen.
24 jastaǵy ana osy qylyǵy arqyly óz balalarynyń densaýlyǵyna qaýip tóndirdi. Sol sebepti, qaraýsyz qaldyrǵan áıel balǵyndaryn alty aı boıy kóre almaıdy. Bul - kámeletke tolmaǵandardyń quqyqtaryn qorǵaý jónindegi komıssııanyń sheshimi. Osy ýaqyt aralyǵynda balalar Qostanaıdaǵy «Delfın» sábıler úıinde bolady. Kishisi qarasha aıynda Astanaǵa baryp, tomografııadan ótedi.
Qarabalyq turǵyndarynyń aıtýynsha, úıdiń otaǵasy bala-shaǵasyn tastap basqa oblysqa kóship ketken. Áıeldiń ishimdikke salynýyna osy jaǵdaı sebep bolýy múmkin. Endi ol alty aı ishinde jumysqa turyp, materıaldyq jaǵdaıyn túzemese, analyq quqyǵynan aıyrylýy múmkin. Ózin jaqsy jaǵynan kórsetip, turmystyq jaǵdaıynyń ońalǵanyn dáleldese, balalary mindetti túrde úıine oralady. Aıtpaqshy, áıeldiń birneshe jyl kommýnaldyq tólemderdi ótemeı júrgeni anyqtaldy. Munyń syrtynda úıde elektr jaryǵy joq. Al aýdan turǵyndary onyń osy qaryzdaryn ótep berýge ýáde etipti.
