Qostanaı oblysynyń turǵyny tórt qalany «karantınge japty»
QOSTANAI. QazAqparat - Qostanaı oblysynyń eki turǵyny tótenshe jaǵdaı kezinde tártipti buzǵany úshin ákimshilik jaýapkershilikke tartyldy, dep habarlaıdy QazAqparat oblystyq Polıtsııa departamentiniń baspasóz qyzmetine silteme jasap.
Meńdiqara aýdany Qasqat aýylynyń 28 jastaǵy turǵyny Qostanaı oblysyndaǵy tórt qalaǵa - Qostanaı, Lısakov, Rýdnyı jáne Tobylǵa kirip-shyǵýǵa tyıym salynatyny týraly jalǵan aýdıojazba taratqan. Sol is-áreketi úshin ákimshilik jaýapqa tartylyp, 40 AEK (106 040 teńge) kóleminde aıyppul tóledi.
Budan bólek, Amangeldi aýdanynyń turǵyny tótenshe jaǵdaı kezinde jalǵan málimetterdi taratqany úshin ákimshilik jaýapkershilikke tartyldy. Sot sheshimimen ol 7 táýlikke qamaýǵa alyndy.
«Elde 2020 jyldyń 16 naýryzynan bastap COVID-19 pandemııasyna baılanysty tótenshe jaǵdaı rejımi engizilgenin taǵy bir márte eske salamyz. Osyǵan oraı azamattardy saqtyq sharalaryna túsinistikpen qaraýǵa, jalǵan habarlamalarǵa senbeýge shaqyramyz», - deıdi Polıtsııa departamenti baspasóz qyzmetiniń mamany Kenje Qonysbaı.
Óńirde áleýmettik jeliler men ınternet-resýrstarda halyqty úreılendirip, artyq alańdaýshylyq týdyratyn jalǵan aqparattyń taralýy aıtarlyqtaı artqan.
Jalǵan jańalyqtardy anyqtaý úshin polıtsııa qyzmetkerleri monıtorıng sharalaryn kúsheıtti.
Búginde oblystyq Polıtsııa departamenti jalǵan aqparat taratý boıynsha 8 derekti tirkedi. Buǵan qosa, tótenshe jaǵdaı rejımin buzǵan 388 adamǵa ákimshilik hattama toltyryldy. Qazir sottyń qaraýynda 161 materıal jatyr.
