Qostanaı oblysynyń turǵyny polıtsııaǵa 19 ǵasyrda jasalǵan myltyq tapsyrdy
ASTANA. QazAqparat - Qostanaı oblysy Uzynkól aýdanynyń turǵyny polıtseılerge kóne qarý tapsyryp, elý myń teńge aldy, dep habarlaıdy astanatv.kz.
Ol eski myltyqty buzylǵan úıden taýyp alǵan eken. 19 ǵasyrda jasalǵan kóne jádiger endi Іshki ister departamentiniń murajaıyna qoıylmaq. «Myltyq 1863 jyly Reseıdegi Týla qarý-jaraq zaýytynda jasalǵan. Kóne qarýdy endi departamenttiń mýzeıine joldaımyz»,-deıdi Qostanaı oblystyq ІІD ákimshilik polıtsııa basqarmasynyń bólim basshysy Abzal Bolatov.
Qarý aktsııasy aıasynda aımaq polıtseıleri 118 qarý satyp alǵan. Óńir turǵyndary óz erkimen júzden asa tegis uńǵyly jáne 14 sholaq myltyq tapsyrypty. Bul sharaǵa bıyl respýblıkalyq qazynadan 5 mıllıon 336 myń teńge bólingen. Qazir qarajat túgel ıgerildi. Endi qarý-jaraqty tegin qabyldaımyz, - deıdi tártip saqshylary.
