Qostanaı oblysynyń turǵyny kólik salyǵyn tólemegeni úshin eki táýlikke qamaldy
16 maýsymda kólik salyǵyn tólemegeni úshin Qostanaı qalalyq soty boryshkerdi 2 táýlikke qamaýǵa alý týraly sheshim shyǵardy.
Sondaı-aq, Memlekettik kirister departamentiniń, jeke sot oryndaýshylarynyń, polıtsııa jáne prokýratýra qyzmetkerleriniń birlesken jumysy sheńberinde 15 maýsymda 207 myń teńge somasynda salyq tólemegeni úshin «LAND CRUISER 200» avtokóligi aıyppul turaǵyna qoıyldy.
Memlekettik kirister departamenti kólik quraldary boıynsha salyq bereshegin ýaqtyly ótemegen jaǵdaıda sot oryndaýshylarymen jumys sheńberinde bereshekti májbúrlep óndirip alýdyń mynadaı sharalary qoldanylatynyn eskertedi:
- ýákiletti organdarda tirkeý is-áreketterin shekteý;
- boryshkerdiń elden tys jerlerge shyǵýyna tyıym salý;
- boryshkerdi qamaýǵa alý;
- júrgizýshi kýáliginiń qoldanylýyn toqtata turý;
- banktik shottar men ózge de múlikke tyıym salý.
Jeke sot oryndaýshylary bereshek somasynan basqa, bereshek somasynyń 25%-yna deıingi mólsherde qosymsha aqy óndirip alady.
Eske salsaq, 2022 jylǵa jeke tulǵalardyń kólik quraldaryna salyq tóleý merzimi 2023 jylǵy 1 sáýirde aıaqtalǵan bolatyn. 19 mamyrdan bastap salyq somasyn ýaqtyly tólemegen tulǵalarǵa 1 AEK-ten joǵary bereshek somalary boıynsha jeke tulǵanyń bereshegin óndirip alý týraly salyq buıryqtaryn joldaý bastaldy.
Bereshek tólenbegen jaǵdaıda salyq buıryǵy tabys etilgen kúnnen keıin 5 jumys kúni ótken soń, jeke sot oryndaýshylarynyń óńirlik palatasyna májbúrlep oryndatýǵa jiberiledi. Jeke sot oryndaýshylary «Atqarýshylyq is júrgizý jáne sot oryndaýshylarynyń mártebesi týraly» Qazaqstan Respýblıkasynyń Zańyna sáıkes bank shottary men múlkine tyıym salý túrinde májbúrlep óndirip alý sharalaryn qoldanýǵa quqyǵy bar. Onyń ishinde 40 AEK-ten asatyn qaryz bolsa, azamatqa el aýmaǵynan shyǵýǵa tyıym salynýy múmkin.
El aýmaǵynan shyǵýǵa tyıym salý týraly aqparatty osy silteme arqyly bilýge bolady.
Salyq boıynsha bereshektiń bary nemese joq ekendigi týraly málimetterdi e-Salyq Azamat mobıldi qosymshasynan bilýge bolady: Elektrondy servıster→Salyq jáne áleýmettik tólemder boıynsha bereshek týraly qyzmeti→JSN-dy engizý.
