Qostanaı oblysynyń turǵyny ákelik quqyǵynan aıyryldy
QOSTANAI. QazAqparat - Qostanaı oblysynda túrli syrqaty bar toǵyz jasar ul bala ata-anasyz qaldy, dep habarlaıdy QazAqparat tilshisi.
Qostanaı oblystyq sotynyń baspasóz qyzmetiniń málimdemesine súıensek, sot balanyń anasyn da óz quqyǵynan aıyrǵan. Ol kezde balasy nebary 3 jasta edi. Anasyz qalǵan ul 2011-2014 jyldary «Delfın» balalar úıinde, odan soń jetim balalar men ata-anasynyń qamqorlyǵynsyz qalǵan balalarǵa arnalǵan № 2 mektep-ınternatynda tárbıelendi.
2016 jylǵy qazanda Áýlıekól aýdany ákimdiginiń bilim berý bóliminiń kelisimi negizinde azamat T. AHAT organy arqyly ákeligin ornatyp, balany óz tárbıesine alyp ketedi.
2017 jyly sáýir aıynda muǵalimder bala denesindegi kóptegen dene jaraqatyn kóredi. Onyń sabaǵy nasharlap, minez-qulqy da ózgere bastaıdy. Oqýshymen jeke jumys isteý kezinde ákesiniń ishimdik ishken kúıde belbeýmen urǵany anyqtaldy.
Ákesine qatysty QR QK 140-babynyń 2-bóligi boıynsha qylmystyq is qozǵaldy. Qostanaı qalasy ІІB tekserisinen soń azamat T.-nyń turǵyn úısiz, jataqhananyń bólmesinde turatyny belgili boldy. Sondaı-aq, ol qoǵamdyq oryndarda ishimdik ishkeni úshin ákimshilik jaýapkershilikke birneshe ret tartylǵan.
Іstiń mán-jaıyn zerdelep, taraptardy tyńdap, sot azamat T.-ny ata-ana quqyǵynan aıyrdy. Sondaı-aq, «Áýlıekól aýdany ákimdiginiń bilim berý bólimi» MM, «Qostanaı qalasy ákimdiginiń bilim berý bólimi» MM, Qostanaı oblysy bilim berý basqarmasy atyna Qazaqstan Respýblıkasy zańyn buzǵany týraly jeke uıǵarym shyǵaryldy.
