Qostanaı oblysynyń turǵyndary bir aıǵa jýyq ýaqyt gazsyz otyrady

QOSTANAI. QazAqparat - Tamyz aıynda «Qartaly-Rýdnyı» gaz qubyryn jóndeý jumystaryna baılanysty Qostanaı oblysynyń aýdandary gazdan ajyratylady, dep habarlaıdy QazAqparat.

«Intergaz Ortalyq Azııa» AQ 2022 jylǵy 1-25 tamyz aralyǵynda Qostanaı oblysynyń tutynýshylaryn aqaýsyz jáne úzdiksiz gazben qamtamasyz etý maqsatynda «Qartaly-Rýdnyı» magıstraldy gaz qubyrynda jóndeý-qurylys jumystaryn júrgizýdi josparlap otyr.

Sondyqtan osy ýaqyt aralyǵynda Jitiqara, Qarabalyq jáne Qamysty aýdandaryn qospaǵanda, tutynýshylardyń barlyq sanattary úshin gaz berý toqtatylady.

«Jumys «Intergaz Ortalyq Azııa» AQ-nyń qubyr ishinde anyqtaǵan korrozııa-qaýipti aqaýlardyń kóp bolýyna baılanysty júrgiziledi» dep habarlady «QazTransGaz Aımaq» AQ Qostanaı fılıaly.

«Qartaly-Rýdnyı» magıstraldy gaz qubyry 1965 jyldan beri, ıaǵnı 57 jyl boıy úzdiksiz jumys istep keledi. Ol - Qazaqstanda paıdalanýǵa berilgen alǵashqy gaz qubyrlarynyń biri.

«Gaz qubyrynyń uzaq ýaqyt paıdalanylýy birtindep apat qaýpiniń artýyna alyp keledi. Bul jaǵdaı jylytý maýsymynda Qostanaı oblysynyń eldi mekenderi, óndiristik jáne áleýmettik nysandaryn gazben jabdyqtaý jumysynyń buzylýyna ákelýi múmkin», - dep qosty «QazTransGaz Aımaq» AQ.

Osyǵan baılanysty tutynýshylarǵa gazdan ajyratý kezeńinde balamaly kózderge kóshý qajettigi týraly eskertiledi.