Qostanaı oblysynyń sporttaǵy úzdik jetistikteri qandaı
QOSTANAI. QazAqparat – Qostanaı oblysynyń ákimi Arhımed Muhambetov halyqqa esep berý jıynynda sport salasyndaǵy 2019 jyldyń basty jetistikteri týraly aıtty, dep habarlaıdy QazAqparat.
Oblys ákiminiń aıtýynsha, 2019 jyly óńirde sport ınfraqurylymyna qomaqty qarjy bólindi. 2,5 myńǵa jýyq sport nysanynyń arqasynda jappaı sportpen aınalysatyn halyqtyń úlesi 31,6%-ǵa jetti. Jalpy 30 sport alańy, onyń ishinde aýyldyq jerde 12 jańa sport alańy paıdalanýǵa berildi.
«Oblys sporty aıtýly jańalyqtarǵa toly boldy. Rýdnyı qalasynda memlekettik-jekeshelik áriptestik boıynsha ınvestorlardyń bastamasymen «Fýtzal Arena» fıtnes ortalyǵynyń qurylysy bastaldy. Oblys ortalyǵynda 1 000 kórermen ornyna arnalǵan «Qostanaı» sport kesheni jáne 3 000 kórermen ornyna arnalǵan «Tobyl Arena» fýtbol maneji salyndy. 2 500 kórermenge arnalǵan Muz sport saraıy jáne 50 metrlik basseın ashylady. Boks mektebi ǵımaratynyń qurylysy bastaldy. Sonymen qatar shańǵy bazasy paıdalanýǵa beriledi. Qostanaıdyń «Aıat» shaǵyn fýtbol klýby alǵashqy ret UEFA Chempıondar lıgasyna qatysty. Qazaqstan úshin biregeı sport nysany – «TobylArena» manejiniń ashylýy jyldyń erekshe sport jańalyǵyna aınaldy. 3000 kórermen sııatyn arena Qazaqstan chempıonatynyń matchyn ótkizdi», - dedi Arhımed Muhambetov.
2019 jyly halyqaralyq dárejedegi sport sheberi Qabyl Tursynaı Qazaqstan tarıhynda alǵashqy ret paýerlıftıngten Álem chempıonatynda altyn medal jeńip aldy.
Sportshylar túrli dárejedegi 71 medal jeńip alyp, álemdik arenada birneshe ret úzdik atandy. Jeńil atletıka ardageri, alty dúrkin álem chempıony jáne rekordshysy Sergeı Polıkarpov Malaızııada «altynǵa» qol jetkizse, al Tamerlan Shadýkaev Majarstanda grek-rım kúresinen Álem chempıonatynda «qola» júldeni ıelendi.
