Qostanaı oblysynyń orman alqaptaryna beınekameralar ornatylady
Tabıǵı resýrstar jáne tabıǵat paıdalanýdy retteý basqarmasy basshysynyń orynbasary Saıat Júsipbekovtiń aıtýynsha, bul shara orman órtiniń aldyn alý jáne boldyrmaý úshin qabyldanǵan.
«Óńirdiń orman alqaptaryna beınebaqylaý kameralary qoıylady. Kameralar biryńǵaı júıege qosylady. Tórt operator oblystyń barlyq orman qoryndaǵy jaǵdaıdy baqylap otyrady. Qazir bıýdjetke tapsyrys berdik. Bir beınebaqylaý qurylǵysynyń quny 3 mıllıon teńge shamasynda. Osylaısha, eskirgen orman munaralaryn beınekameralarmen almastyramyz. Mundaı kameralar órt oshaǵyn 10 mınýt ishinde anyqtaı alady. Bir qurylǵy arqyly 20 shaqyrym radıýstaǵy aýmaqty baqylaýǵa bolady», - deıdi Saıat Júsipbekov.
Tyń júıe jaqyn arada pılottyq negizde Araqaraǵaı orman alqabyna qoıylady. 2020 jyldyń qańtar aıynan beri oblysta eki orman órti tirkeldi. Ekeýi de Qarabalyq aýdany aýmaǵynda bolǵan.