Qostanaı oblysynyń mektepterine 8,5 myń kompıýter tapsyryldy

QOSTANAI. QazAqparat – Qostanaı oblysynda 337 mektep shtattyq rejımde jumys isteıdi. Bul týraly óńirlik kommýnıkatsııalar alańynda ótken brıfıngte oblystyq bilim basqarmasynyń basshysy Záýre Báımenova málim etti, dep habarlaıdy QazAqparat.

Jańa 2020-2021 oqý jylynyń birinshi toqsany aıaqtalýǵa jaqyn. Oblys mektepterindegi oqý protsesi josparly rejımde júrgizilýde. Jalpy 494 mektepte 110 206 oqýshy bilim alady. Qazir sonyń ishinde 337 mektep shtattyq rejımde oqytýda.

«63 myń bala «Kúndelik», «Mektep Online» syndy bilim berý tuǵyrnamalaryn paıdalana otyryp, qashyqtan bilim alyp jatyr. 157 mektepte ata-analardyń ótinishi boıynsha bastaýysh synyptardyń oqýshylary úshin kezekshi toptar jumys isteıdi. Mundaı formatta bastaýysh synyptardyń árbir ekinshi oqýshysy oqıdy. Oqý jyly bastalǵaly 30 myńnan asa sabaq ótkizildi. Qashyqtan oqytýdyń sapaly jaǵdaılaryn jasaý maqsatynda jergilikti bıýdjetten jáne úkimet rezervinen 3,8 mlrd teńge somasyna 21 myń kompıýter satyp alyndy. Jaqynda mektepterge 1,7 mlrd teńgege 8,5 myń kompıýter tehnıkasy jetkizildi. Osy jyldyń qazan aıynyń sońyna deıin taǵy 12 743 noýtbýk pen planshettiń jetkizilýi kútilýde, olar oblystyń barlyq 20 óńirine taratylady», - dedi basqarma basshysy.

Jazda 133 bilim berý nysanyna kúrdeli jáne aǵymdaǵy jóndeý jumystaryn júrgizýge 11,1 mlrd teńge bólingen bolatyn. Bul ótken jylǵy kórsetkishterden 3 ese artyq. 2021 jyly bul tizimge «Jumyspen qamtý jol kartasy sheńberiniń» jobalary qosylady.

«Aldyn ala tizimge 15,1 mlrd teńge somasyna 113 nysan kirdi. Onyń ishinde 32 nysan kúrdeli jóndeýden ótedi. Obektilerdiń naqty tizimi 2021 jylǵa arnalǵan bıýdjet bekitilgennen keıin anyqtalady», - dedi Z.Báımenova.