Qostanaı oblysynyń mektepterine 15 myń kompıýter satyp alynbaq
QOSTANAI.QazAqparat – Oblystaǵy 490 mektep oqý jylynyń basyna deıin joǵary jyldamdyqty ınternetke qosylatyn bolady. Bul týraly óńirlik kommýnıkatsııalar alańynda ótken brıfıngte oblys ákimi Arhımed Muhambetov málim etti, dep habarlaıdy QazAqparat
Mektepterdi kompıýtermen jaraqtandyrý úshin jazǵy kezeńde bıýdjetten 1,4 mlrd teńge bólindi. Osylaısha, oblystyń bilim berý uıymdarynyń kompıýterlik parkin 50% jańartýǵa múmkindik týdy.
«Qazaqstan Respýblıkasy Bilim jáne ǵylym mınıstrligi úkimet rezervinen jalpy somasy 2,4 mlrd. teńgege 15 myńnan astam kompıýterlik tehnıka birligin satyp alýǵa qosymsha qarajat bóledi. Osy resýrstar pedagogter men oqýshylardyń kompıýterlik tehnıkaǵa qajettiligin óteýge jetkilikti. Qazir muǵalimder men oqýshylarǵa 11188 kompıýterlik tehnıka birligi berildi, onyń ishinde 176 pedagog oqytý quraldarymen tolyq qamtamasyz etildi. Internetke qoljetimdilikti qamtamasyz etý úshin ártúrli qarjylandyrý kózderi esebinen mobıldi ınternet modemderi satyp alynýda. Sondaı-aq oblystyń barlyq 490 mektebi oqý jylynyń basyna deıin joǵary jyldamdyqty ınternetke (4 Mbıt/s-ten) qosylatyn bolady. Osy maqsatta 2020 jyly 163,5 mln teńge qarastyryldy», - deıdi óńir basshysy.
Qashyqtan oqytýdyń tártibin túsindirý úshin oqý jyly bastalǵanǵa deıin balalarǵa arnalǵan biryńǵaı synyp saǵattary ótkiziledi. Buǵan qosa «Úıde qalaı oqý kerek», «Kıberkýltýra» atty biryńǵaı ata-ana dáristeri uıymdastyrylmaq.
Buǵan deıin Qostanaı oblysynda 265 mektep qalypty jaǵdaıda jumys isteıtini habarlandy.
