Qostanaı oblysynyń mektepteri tolyǵymen ınternetke qosyldy

QOSTANAI. QazAqparat - Qostanaı mektepteriniń 100 paıyzy ǵalamtor jelisine qosyldy. Bul týraly oblys ákimdiginde ótken jıynda oblystyq bilim basqarmasynyń basshysy Bátıma Daýmova aıtty, dep habarlaıdy QazAqparat.

Bıyl Qostanaı oblysy mektepterin ınternetke qosý úshin jergilikti bıýdjetten qosymsha 210 mln teńge baǵyttaldy.

«Búginde óńirdegi 514 mekteptiń barlyǵy ınternet jelisine qosyldy. Onyń ishinde 509 mektepke keńjolaq ınternet júrgizilgen. Ońtústik aýdandardaǵy 5 mektep tehnıkalyq múmkindikterge baılanysty bul qyzmetke tirkelmegen. Munymen qatar 445 mektep mýltımedııalyq qurylǵylarmen jabdyqtaldy. 2018 jyly barlyq bilim berý mekemelerine zamanaýı jabdyqtar tartý josparlanǵan. Bul maqsatta 267,8 mln teńge jumsalady», - dedi B.Daýmova óz baıandamasynda.

Qazirgi ýaqytta oblystaǵy bilim mekemelerine 14024 kompıýter qajet. Onyń 2165-i - kolledjderge. Basqarmanyń málimetinshe, kompıýter parkin tolyǵymen jańartýǵa 300 mln teńge qarjy kerek.

Oblys mektepteriniń barlyǵy «Kúndelik» jáne BilimLand bilim platformasyna tirkeldi. Bul kórsetkish boıynsha Qostanaı oblysy elimizde 2-orynda tur. Naqtyraq aıtqanda, 85 myńnan astam ata-ana oqýshylardyń baǵalaryn onlaın túrde qaraıdy.

Jıynda aıtylǵandaı, jańa oqý jylynan bastap mektepke deıingi balalar uıymdaryna joldama berý jáne birinshi synypqa qabyldaý úshin arnaıy avtomattandyrylǵan júıe engiziledi. Mektepke deıingi balalar uıymdaryna joldama berýdi avtomattandyrýdy Qostanaı, Lısakov jáne Rýdnyı qalalary iske asyrady. Qalǵan óńirler bul jobany jyl aıaǵyna deıin engizbek. Atalmysh avtomattandyrylǵan júıeni oblysta iske asyrý úshin 282 mln teńge jumsalady. Jańa jobanyń artyqshylyǵy - balabaqshalar men mektepterge kezek tártibi retke keledi.

Eske salsaq, QR Bilim jáne ǵylym mınıstrligi balalardy birinshi synypqa qabyldaý erejesindegi tolyqtyrýlar men ózgertýlerdi jarııalaǵan bolatyn.

Foto: tvc.ru