Qostanaı oblysynyń emdeý mekemelerinde oryn tapshylyǵy baıqalyp otyr – Bas sanıtar
QOSTANAI. QazAqparat – Qostanaı oblysynda sońǵy kúnderi koronavırýs ınfektsııasy boıynsha epıdemıologııalyq jaǵdaıdyń kúrt nasharlaǵany baıqaldy. Osyǵan baılanysty óńirdiń bas memlekettik sanıtar dárigeri úndeý jarııalaıdy, dep habarlaıdy QazAqparat.
Qostanaı oblysynyń memlekettik sanıtar bas dárigeri Vladımır Nechıtaılonyń aıtýynsha, aımaqta kún saıyn shamamen 50-100 adam indet juqtyrady. Aýrý juqtyrǵandar sany 518 adamǵa jetken.
«Apta saıyn syrqattaný jaǵdaıynyń ósýin taldaımyz. 8-14 maýsym aralyǵynda aýrýdyń 56 jaǵdaıy esepke alynǵan, ósim - 26,5%. 15-21 maýsym aralyǵynda – 251 jaǵdaı, ósim 94%-dy qurady. Negizgi aýrý oshaǵy – Qostanaı qalasy, munda 97 jaǵdaıǵa jetti, Rýdnyı qalasynda 24 derek tirkeldi. Buǵan deıin tirkelmegen ońtústik aımaqtarda naýqastanǵandar anyqtaldy. Syrqattar sanynyń ósýine baılanysty zerthanalar qosymsha júktememen jumys isteı bastady. Naýqastardy emdeýge tartylǵan medıtsına qyzmetkerleri de osylaı jumys isteýde. Buǵan qosa Qostanaı oblysynyń emdeý mekemelerinde oryn tapshylyǵy baıqalýda. Rezervtik tósek-oryndardy daıyndaý boıynsha jumystar júrgizilýde», - deıdi Nechıtaılo.
Sanıtar dárigerdiń pikirinshe, mundaı jaǵdaıdyń sebepteri karantın rejımin jappaı oryndamaý bolyp otyr. Turǵyndar tarapynan da, kásipkerlik sýbektilerden de olqylyqtar baıqalady.
Shekteý sharalaryna qaramastan toı jasap, merekelik keshterdi ótkizip jatqandar bar. Qostanaı qalasynyń 2 balabaqshasynda qyzmetkerler Covid-19 aýrýyn juqtyrǵan.
Sol sebepti óńirde 23 maýsymnan bastap karantın rejımi qatańdatylady. Naqty salalardaǵy shekteý sharalary týraly Qostanaı oblysynyń bas memlekettik sanıtar dárigeri úndeý jarııalaıdy.
