Qostanaı oblysynyń eksport taýarlary 70 paıyzǵa ósken
QOSTANAI. QazAqparat - Qostanaı oblysynyń kompanııalary taýar dıstrıbıýtorlarynyń jelilerin kóbeıtip keledi. Bul týraly oblys ákimdiginde ótken Qostanaı eksporttaýshylary keńesinde málim etildi, dep habarlaıdy QazAqparat.
Basqosýda qazaqstandyq taýarlardyń syrtqy naryqqa beıimdelýi talqylandy. Taýarlardy eksportqa shyǵarý úshin olardy saqtandyrý mańyzdy kezeń sanalady.
Qostanaı ekonomıkasynyń negizgi tetigi - avtoóndiris. 2018 jyldyń aıaǵyna deıin qostanaılyq avtokólikter Reseı men Orta Azııa elderine satylmaq. Allur Group avtomobıl kompanııalarynyń tobynyń Basqarma Tóraǵasy Andreı Lavrentev aıtqandaı, qazirdiń ózinde 1,5 mlrd teńgeniń ónimi saqtandyrylǵan.
«Allur Group avtomobıl kompanııalarynyń toby óz ónimderin álemniń birneshe eline eksportqa shyǵarady. Onyń ishinde, 7,5 myń kólik Qytaıǵa satylady. Tek qana JAC markaly kóliktiń 3 myńnan astam danasyn Reseıge jetkizemiz. Kelesi jyly ónimderimizdi Reseıdiń Sankt Peterbýrg, Máskeý jáne Batys Sibir aımaqtaryna usynamyz», - deıdi basqarma tóraǵasy.
Al oblys ákimi Arhımed Muhambetov avtokólikterdi shyǵarýda sanǵa emes, sapaǵa nazar aýdarýdy tapsyrdy.
«2016 jyly 2-3 myń ǵana kólik shyqty. Byltyr 6 myńǵa deıin jetkizdińizder. Osy jyldyń sońynda 11 myń kólik qoldanysqa beriledi. Degenmen, kelesi jylǵy kórsetkishterińiz oılandyrady. 25 myń kólik shyǵarý úshin de qomaqty qarjy kerek. Bastysy, sapaǵa mán berińizder», - dedi Arhımed Muhambetov.
Syrtqy naryqqa shyǵýǵa qaýqarly taǵy bir kompanııa - Qarabalyq aýdanyndaǵy «Astyq ındýstrııasy» agroholdıngi. Búginde bul kompanııa «Qazaqstan et odaǵy» jáne «Qostanaı oblysynyń et klasteri» jobalarynyń turaqty qatysýshysy. «Astyq Indýstrııasy» JShS Reseı men Ózbekstanǵa eksportqa shyǵady. Endigi maqsat - qazaqstandyq ónimderdi syrtqy suranysqa daıyndaý.
Arhımed Muhambetov eksporttaýshylardyń jumystaryna jaqsy baǵasyn berdi. Degenmen, alda baǵyndyrar beles kóp.
«Eksport tek qana ulǵaıýy tıis. Sol sebepti kásipkerlerge tynbaı eńbektene berý qajet. Syrtqy naryq baǵytynda «KazakhExport» eksporttyq saqtandyrý kompanııasynyń kómegi zor. 2017 jyly oblystyń ishki saýda-sattyǵy 2 mlrd 31 mln dollardy qurady. Al osy jyldyń 7 aıynda eksport taýarlary 70 paıyzǵa deıin ósip, 947 mln dollarǵa jetti», - dedi aımaq basshysy.
Qostanaı oblysy álemniń 90-nan astam elimen saýda-sattyq baılanysyn ornatty. Eksport taýarlarynyń kóbi Reseıge jóneltiledi. Búginde atalmysh kórsetkish 53 paıyzǵa teń. Sondaı-aq, qostanaılyqtardyń ónimine Qytaı, Tájikstan, Ózbekstan, Iran sııaqty elder qyzyǵýshylyq tanytýda.
