Qostanaı oblysynyń eki turǵynynan quny 100 mln teńge bolatyn sıntetıkalyq esirtki tárkilendi

ASTANA. QazAqparat - Qostanaı oblysy PD esirtki qylmysyna qarsy is-qımyl basqarmasynyń qyzmetkerleri «Qarasora – 2023» jedel aldyn alý sharasyn ótkizý kezinde sıntetıkalyq esirtkini taratýmen aınalysqan eki jas jigitti ustady, – dep habarlaıdy Polisia.kz.

Qostanaı oblysy PD esirtki qylmysyna qarsy is-qımyl basqarmasynyń bastyǵy Nurjan Ahmetovtyń aıtýynsha, jedel-izdestirý sharalary barysynda jaldamaly páterde oblys ortalyǵynyń 21 jáne 22 jastaǵy eki turǵyny ustaldy. Páterdi tintý kezinde polıtsııa qyzmetkerleri tórt keliden astam A-PVP esirtkisin tárkiledi. Sonymen qatar elektrondy tarazylar, 240 shaǵyn-magnıtter, elektr taspasy, folga jáne esirtkini oraýǵa arnalǵan basqa da qurylǵylar tabyldy. Qara naryqta asa iri mólsherde alynǵan sıntetıkalyq esirtki partııasynyń quny shamamen 100 mln teńgeni quraıdy. Bul partııada – 15 myńnan astam doza bar.

Qazirgi ýaqytta kúdiktiler qamaýǵa alyndy. Polıtsııa QR QK-niń 297-baby 3-bóligi boıynsha (Esirtki quraldaryn, psıhotroptyq zattardy, olardyń analogtaryn ótkizý, jóneltý maqsatynda zańsyz daıyndaý, qaıta óńdeý, satyp alý, saqtaý, tasymaldaý) boıynsha sotqa deıingi tergep-tekserýdi bastady.Baptyń sanktsııasy aıasynda qylmys jasaǵan adamnyń múlki tárkilenip, 15 jylǵa deıin bas bostandyǵynan aıyrýdy qamtıdy. Jyl basynan beri Qostanaı oblysy PD esirtki qylmysyna qarsy is-qımyl qyzmetkerleri zańsyz aınalymnan 328 keli túrli esirtki zattaryn tárkiledi.