Qostanaı oblysynyń dıqandary egis jumystaryn bastady
QOSTANAI. QazAqparat – Qostanaılyq dıqandar kóktemgi egis jumystaryna kiristi, dep habarlaıdy QazAqparat oblystyq Aýyl sharýashylyǵy jáne jer qatynastary basqarmasyna silteme jasap.
Bıyl óńirde tuqym baǵasy bir jarym ese qymbattaǵan. Buǵan qosa, pandemııa saldarynan shekara jabylǵasyn, qosalqy bólshek satyp alý da qıynǵa túsken. Osyndaı qıyn jaǵdaıda sharýalardy qoldaý úshin Qazaqstan Úkimeti tek osy óńirge kóktemgi egiske dep 21 mlrd teńge bóldi. Nátıjesinde, osy jyly aımaqta 5,2 mln gektar alqapqa dán sebiledi. Qazirdiń ózinde sharýalar 200 myńnan astam jerge astyq ekken. Olardyń deni – dándi daqyldar, kartop, kókónis jáne maıly daqyldar.
«Sınoptıkterdiń málimetteri boıynsha, ylǵaldyń mólsheri mamyr aıynda ortasha eseppen 10 mm-ge jetýi múmkin. Uzaq merzimdi boljamǵa sáıkes, bıylǵy jazdyń aýa raıy 2004 jylǵy uqsas kezeńmen sáıkes keledi. Kóktemgi egis naýqanyna oblystyń barlyq aýdandarynda tehnıka kirisip ketti. Aýyl sharýashylyǵy taýaryn óndirýshiler egis naýqanyn 15 mamyrdan keıin bastaýdy uıǵaryp otyr. Kóktemgi dala jumystary maýsym aıynyń basyna deıin jalǵasady. Aýa raıy, joǵary temperatýrany, jaýyn-shashynnyń jetispeýin eskere otyryp, ylǵaldy saqtaý boıynsha is-sharalar júrgizilýde. Topyraqty egý aldynda óńdeý, hımııalyq ádispen aramshóptermen kúres – taýar óndirýshilerdiń eń mańyzdy jumysy», – deıdi oblystyq Aýyl sharýashylyǵy jáne jer qatynastary basqarmasy bóliminiń basshysy Esimjan Baımaqanov.
Oblysta kóktemgi egis jumystaryna 71 myń tonna dızel otyny bólindi. Jeńildetilgen otyn lıtrine 165 teńgeden satyp alynady. Egis alqabynda sanıtarlyq normalar tolyǵymen saqtalǵan. Sharýa qojalyqtary men qyzmet kórsetý kompanııalary jumysshylaryn jeke qorǵanysh jáne antıseptıkalyq quraldarmen qamtamasyz etedi.
