Qostanaı oblysynyń delegatsııasy Tatarstan Respýblıkasyna bardy
QOSTANAI. QazAqparat - Qostanaı oblysy ákiminiń orynbasary Meıirjan Myrzalıev bastaǵan delegatsııa Tatarstan Respýblıkasyna issaparmen bardy, dep habarlaıdy QazAqparat tilshisi.
Qostanaılyqtar birneshe mınıstrlik, vedomstvolar men uıymdar basshylarymen kezdesýler ótkizdi.
Tatarstan Respýblıkasy Premer-mınıstriniń birinshi orynbasary Rýstam Nıgmatýllın óz sózinde eldiń Qostanaı oblysymen áriptestik baılanysyna toqtaldy. Óz kezeginde Qostanaı oblysy ákiminiń orynbasary M.Myrzalıev óńirdiń ekonomıkalyq kórsetkishteriniń ósimi, ınvestıtsııalyq áleýeti týraly aıtty.
Sonymen qatar Tatarstan Respýblıkasy ınvestıtsııalyq damý agenttiginiń basshysy Talııa Mınýllına óz elinde júzege asyrylǵan ınvestıtsııalyq jobalardyń birazymen tanystyrdy. Aıta ketý kerek, Tatarstan -ınvestıtsııalyq tartymdylyq boıynsha edáýir tájirıbe jınaǵan memleket. Muny sáýlet, qurylys jáne turǵyn-úı kommýnaldyq sharýashylyǵy salalaryndaǵy birqatar aýqymdy jobalar dáleldeıdi. Sonyń biri - lıft shyǵarý zaýyty. Eske salsaq, 2018 jyldan bastap Qostanaıda jylyna 500-den astam lıft shyǵarylady .
Oblys ákimi orynbasary Meıirjan Myrzalıevtiń aıtýynsha, aldaǵy ýaqytta ekijaqty áriptestik aıasynda Tatarstan Respýblıkasy lıftterge tapsyrys bere alady.
Delegatsııa birneshe ındýstrııalyq parkterdi, atap aıtqanda, «Alabýga» aıryqsha ónerkásip-óndiristik túrindegi ekonomıkalyq aımaǵy, «Hımgrad» tehnopolısi men «Sınergııa» parkin aralady. Tatarstan Respýblıkasy Premer-mınıstriniń birinshi orynbasary Rýstam Nıgmatýllınniń aıtýynsha, «Alabýga» óndiristik aımaǵy jekeleı salalarda jaqsy kórsetkishterge ıe. Máselen, sońǵy 11 jyl ishinde 27 mlrd rýbl paıda tapqan. Búginde óndiristik aımaqtyń 56 rezıdenti jumys isteıdi. Negizinen mashına jasaý, hımııa, qurylys materıaldary, metall óńdeý salalary boıynsha ónim shyǵarady. Investıtsııalyq jobalar aýmaǵy 3,5-50 gektar aralyǵynda. Kompanııanyń kadrlyq jaǵdaıy da jaman emes. Munda 700 adam shtatta bolsa, onyń 600 qyzmetkeri qyzmet kórsetý salasynda eńbek etedi.
