Qostanaı oblysynyń bıýdjeti ózgertildi
2018 jyly oblys bıýdjetine jalpy kólemi 2,2 mlrd teńge qarjy túsken. Onyń 85%-i - memleket bólgen maqsatty transfertter men sýbventsııalar, ıaǵnı keıin qaıtarylyp beriletin maqsatty járdem qarjylar. Oblystyq qarjy basqarmasynyń basshysy Alma Júsipovanyń aıtýynsha, byltyr oblys bıýdjeti tolyq ıgerilgen. Bıýdjet qarjysyn tıimdi ıgerý jóninen Qostanaı oblysy respýblıka boıynsha Aqtóbeden keıin ekinshi orynda keledi.
«Bıýdjet shyǵystarynyń negizgi úlesi halyqtyń turmys jaǵdaıyn jáne ál-aýqatyn jaqsartýǵa baǵyttalǵan sharalarǵa tıesili. Budan basqa, ekonomıkanyń osy sektoryna bıýdjet qarajatyn quıýdyń jyl saıynǵy ósýi baıqalady. Onyń úles salmaǵy 2017 jylmen salystyrǵanda 2,6% - ǵa ulǵaıdy. Sonymen qatar, turǵyn úı qurylysyna 12,1 mlrd teńge somasynda qarjy bólindi», - dedi Alma Júsipova.
Jıynda oblystyq ekonomıka jáne bıýdjettik josparlaý basqarmasy basshysynyń orynbasary Elena Derıı baıandama jasady. Onyń sózinshe, memlekettik satyp alýǵa arnalǵan bıýdjettik baǵdarlamalarǵa bólingen qarjydan 2 mlrd teńge únemdeldi. Únemdelgen qarjynyń 452,6 mln teńgesi Amanqaraǵaı aýylyna kógildir otyn tartýǵa jumsalady. Oblys ortalyǵynda boı kóterip jatqan jańa shaǵyn aýdandarǵa kóshe salýǵa jáne qala kósheleriniń oı-shuqyryn jamaýǵa 404,5 mln teńge bólindi.
«Óńirdegi kásipkerlikti damytýǵa 280,5 mln teńge qarastyrylǵan. Bıyl «Bıznestiń jol kartasy - 2020» baǵdarlamasy arqyly 101 kásipkerge qarjylaı qoldaý kórsetilmek. Sonymen qatar, bıyl Taran aýdanyndaǵy Novolınov mektebindegi kúrdeli jumystaryn aıaqtaýǵa 82,2 mln teńge bólinip otyr. Aldaǵy jyly Amangeldi - Úrpek - Rahmet - Álibı tas jolyna ortasha jóndeý jalǵasady. Amangeldi kentindegi M. Mámetova atyndaǵy kóshe ońdalyp, Arqalyq - Torǵaı baǵytyndaǵy kúre jol erneýin nyǵaıtyp, bekitý jumystary bastalady. Sondaı-aq, Arqalyqqa 10 myń tonna mazýt jetkizý kózdelgen. Oǵan 140,6 mln teńge qarjy bólindi» , -dedi E.Derıı.
Bıyl Qostanaı qalasynyń «ıÝbıleınyı» shaǵyn aýdanyndaǵy blokty-modýldy jylý qazandyǵynyń qurylysyna qosymsha 100 mln teńge qarjy qarastyrylǵan. Bul usynysty depýtattar biraýyzdan qoldap, maquldady.
Oblys ákimi Arhımed Muhambetovtiń aıtýynsha, bıyl oblystyq bıýdjet qorjynynda ıgerilmegen 782 mln teńge qarjy bar. Ol kelesi jyldyń bıýdjetine kóshedi.
