Qostanaı oblysynyń birneshe aýylyna gaz tartyldy
QOSTANAI. QazAqparat - Búgin Denısov aýdanyna qarasty Alchanov jáne Antonov aýyldary men Qarabalyq aýdanynyń Toǵyzaq eldi mekenine tabıǵı gaz qosyldy, dep habarlaıdy QazAqparat tilshisi.
50 myńǵa jýyq turǵyny bar Denısov jáne Qarabalyq aýdandaryndaǵy 200-ge jýyq úı men mekemege jańa gaz qubyry tartyldy. Onyń uzyndyǵy - 6,5 myń metr. Atalǵan nysandar memlekettik-jekeshelik áriptestik aıasynda iske asyrylyp otyr. 
Gaz qubyryn iske qosýǵa arnalǵan saltanatty rásimge Qostanaı oblysynyń ákimi Arhımed Muhambetov pen «QazTransGaz» AQ bas dırektorynyń orynbasary Muqan Sadýaqasov qatysty.
«Bul bastama ınfraqurylymdy damytýdyń 2015-2019 jyldarǵa arnalǵan baǵdarlamasy sheńberinde qolǵa alyndy. Mine, búgin kópten kútken ıgi iske de qol jetti. Táýelsizdik kúnine tartý dep qabyldańyzdar. Jalpy, gaz taratý jelilerin salýǵa oblystyq bıýdjetten 169,3 mln teńge bólindi. Sonymen qatar jańa jumys oryndary ashylady. Bul qazirgideı aýyr kezeńde jasaǵan asa mańyzdy qadam. Osyndaı múmkindikter úshin «QazTransGaz» kompanııasyna alǵysymyz sheksiz», - dedi oblys ákimi.
Muqan Sadýaqasovtyń aıtýynsha, eki jyl ishinde oblys boıynsha 8 gaz taratý pýnkti ashylǵan. Osylaısha, tabıǵı gazdy paıdalaný kórsetkishi óńirde 10 paıyzǵa kóterildi.
Esterińizge sala ketsek, 2015 jyly Memleket basshysynyń óndiristik protsesterdi turaqtandyrý jónindegi tapsyrmasy aıasynda, gaz qubyrlarynyń qalypty jaǵdaıda jumys isteýin qamtamasyz etý úshin «QazMunaıGaz» UK» AQ, «QazTransGaz» AQ jáne Qostanaı oblysy ákimdigi arasynda memorandýmǵa qol qoıyldy. Memorandýmǵa sáıkes, oblys ákimdigi jer telimderin bólip, gazdandyrý nysandaryn salýǵa múmkindik beretin tıisti ruqsatnamalyq qujattardy ázirledi.
