Qostanaı oblysynyń bas polıtseıi jastardy jumysqa shaqyrdy
Ardaq Yntyqbaevtyń sózinshe, buǵan deıin óńirge qarasty polıtsııa basqarmalary men bólimshelerinde kadr jasaqtaý máselesi kóterildi. Endi tártip saqshylary qataryn tolyqtyrý úshin birqatar jumys atqarylmaq. Jergilikti jerde jastarmen kezdesýler uıymdastyrylyp, ishki ister organyna qyzmetke ornalasý jeńildikteri (baspanamen qamtý, qarjylaı kómek kórsetý) qarastyrylady. Qazirgi ýaqytta kadr tapshylyǵy Qostanaı jáne Rýdnyı qalasy men Jitiqara, Sarykól aýdandarynda aıqyn baıqalady.
«Іshki ister organdarynda tek bilimdi ári fızıkalyq daıyndyǵy myqty azamattar ǵana jumys isteı alady. Talap tym joǵary. Soǵan qaramastan yntalylar da kóp, tek túsindirý jumystary tıisti deńgeıde júrmeı jatyr. Ásirese, aýyldyq jerlerde kemshin tustar bar. Búginde polıtsııa qyzmetiniń jaýapkershiligimen qatar, áleýmettik mártebesi jáne qarjylyq jaǵdaıy da kóterilip keledi. Sondaı-aq, organda jumys isteıtin azamattarǵa basqa da jeńildikter qarastyrylǵan», - deıdi polıtsııa polkovnıgi Ardaq Yntyqbaev.
Rasymen de, qazir jastardyń shalǵaı aýyldarǵa barǵysy joq. Degenmen, aýdandyq polıtsııa bólimsheleri joǵary oqý oryndaryndaǵy, áskerı boryshyn ótep júrgen jastarmen jumys isteýge kóshti. Tipti, ózge oblystaǵy jastarǵa da usynys aıtýda. Máselen, Rýdnyı qalalyq polıtsııa basqarmasyna jýyrda Túrkistan oblysynan jas mamandar kelmek.
«Polıtsııa mamandyǵyn kóbi qaýipti sanaıdy. Biraq otandy qorǵaıtyn, ishki tártipti saqtaıtyn adamnyń bolýy bárinen mańyzdy. Minsiz jumys isteseń, eldiń ıgiligine bólenesiń. Sondyqtan, elimizdegi jastardy polıtsııa qatarynda qyzmet etýge shaqyramyz. Biz ózimiz bastap laıyqty azamattardy qyzmetke qabyldaýǵa ázirmiz», - dep sózin túıdi Ardaq Yntyqbaev.
