Qostanaı oblysynyń aýylyna aýyz sý qubyry tartyldy
Jańa sý qubyry júrgizilgen Novoılınov aýylynda 1500 adam turady. Olar bul jańalyqty birneshe jyl boıy kútti. Sý qubyrynyń qurylysy 2017 jyly bastaldy. Saltanatty sharaǵa oblystyq energetıka jáne TKSh basqarmasynyń basshysy Almat Isenbaev pen aýdan ákimi Qýandyq Espergenov qatysty.
«Eki jyl ishinde aýqymdy jumys oryndaldy. Kótermeli sorǵy stantsııasy, sý tazartý qurylǵysy ornatyldy. 100 kýb taza sý qory jasalyp, ekinshi kótermeli sorǵy stantsııasy salyndy. Sonymen qatar 10 kılovolt bolatyn elektr berý jelisi iske qosyldy. Nysannyń jalpy uzyndyǵy 19 976 metrge jetedi, sonyń ishinde magıstraldy jáne taratýshy jeliler – 11 shaqyrym. Turǵyndarǵa yńǵaıly bolýy úshin 196 qudyq ornattyq. Avtorlyq qadaǵalaý boıynsha «Kochın Vladımır Fedorovıch» jeke kásipkeri qyzmet kórsetti. Sý taratqysh pen jelilerdiń qurylysy respýblıkalyq jáne oblystyq bıýdjet esebinen júrgizildi. Barlyǵy 553,2 mln teńge bólindi. Sýǵa birinshi bolyp Novoılınov orta mektebi qosyldy», - dedi basqarma basshysy.
Aýdandyq ardagerler keńesiniń múshesi, aýyl aqsaqaly Álibı Ótegenovtiń sózinshe, áleýmettik nysannyń iske qosylýy aýdannyń ekonomıkalyq jaǵdaıyn jaqsartýǵa yqpal etedi.
«Buǵan deıin sýdy qudyqtan alyp kelgenbiz. Sol sebepti turǵyndardyń deni arnaıy sý tazartqysh qurylǵylaryn satyp alýǵa májbúr boldy. Alaıda myna jańalyq kóptiń kóńilin kóterdi. Qala turǵyndary sekildi, biz de sapaly aýyz sýǵa qol jetkizdik. Oblys basshylyǵyna alǵysymyz sheksiz», - deıdi Álibı Ótegenov.
Aýyl turǵyndaryna oblys ákimi Arhımed Muhambetovtiń atynan sý jylytqyshtar syıǵa tartyldy.
Aıta keteıik, Beıimbet Maılın aýdanynyń Valerıanovka aýylynda da sý qubyrynyń qurylysy bastaldy. Jumystarǵa 450 mln teńge jumsalmaq.
Jańa áleýmettik nysan 2020 jyly paıdalanýǵa beriledi.
