Qostanaı oblysynyń aýdandary astyqty eksportqa shyǵarýǵa daıyn
QOSTANAI.QazAqparat - Búgin Qostanaı oblysynyń ákimi Arhımed Muhambetov Sarykól, Qarasý aýdandaryna jumys saparymen bardy, dep habarlaıdy QazAqparat.
Óńir basshysy aldymen Sarykól aýdanynyń agroónerkásipik keshenimen tanysty. 22 qyrkúıekke deıingi málimet boıynsha, aýdanda 284,7 myń gektar dándi daqyl, 35,5 myń gektar maıly daqyl egilgen. Alqaptarda 464 kombaın jumys istedi. Máselen, sapaly tehnıkalardyń arqasynda «Melıtopolskoe» JShS dıqandary gektaryna 18,7 tsentner ónim aldy.
«Barlyǵy 12702 gektar egis alqabymyz bar. Kombaındar 7-8 jyl buryn satyp alynsa da, eskire qoıǵan joq. 12 dana «Djon-Dır» kombaıny, 5 dana K-700 jáne 16 traktor bar. Shetelderden bıdaı óńdeıtin zamanaýı tehnıkalardy da ákeldik. Mysaly, BDM dıskili boronnyń 2 danasyn satyp aldyq. Qazirgi ýaqytta seriktestikte 70 adam turaqty jumys isteıdi», - dedi «Melıtopolskoe» JShS dırektory Edýard Dvýrechenskıı
«Melıtopolskoe» seriktestigi bıyl quny 185 mln teńgelik bıdaıtazalaǵysh kesheni qurylysyn saldy. Endi olar astyqty eksportqa shyǵarýǵa qaýqarly. Alaıda, oblys ákimi bıdaı satýǵa asyqpaý kerektigin aıtty.
«Naryqqa shyǵarmastan buryn astyqtyń sapasyna mán berińizder. Esh asyǵýdyń reti joq. Aldymen, qurǵatyp alyńyzdar. Búginde kórshiles Reseı byltyrǵydaı mol astyq jınaǵan joq. Sondyqtan kórshi elderdiń ishki suranysy mol bolýy múmkin. Qazir arzanǵa ótkizgenshe, kóktemge qaraı satyńyzdar», - dedi oblys ákimi seriktestik basshysyna.
Osydan eki jyl uryn Sarykól aýdanynda quny 600 mln teńgege baǵalanǵan iri astyq saqtaý qoımasy salynǵan bolatyn. Qoıma syıymdylyǵy 24 myń tonnaǵa laıyqtalǵan. Investıtsııalyq jobany "Aqpan-Invest" JShS qarjylandyrdy. Osy kezeńde munda 32 adam jumys isteıdi. Atalǵan JShS dırektory Danııar Óteýlınniń sózinshe, astyq jınaý jospar jumystary boıynsha oryndalyp keledi.
Arhımed Muhambetov Qazaqstandaǵy eń iri astyq qoımasy - Sarykól elevatorynda boldy. Elevatordyń syıymdylyǵy 400 myń tonnadan astam. Bul - shamamen oblystaǵy eki aýdannyń astyǵy. Elevatorda saqtaý, keptirý, tıeý, óńdeý sııaqty 5 qyzmet túri kórsetiledi. Arhımed Muhambetov aýyl sharýashylyǵy taýar óndirýshilerdiń jumysyna jaqsy baǵasyn berdi.
«Astyq kólemi boıynsha byltyrǵy jyldyń kórsetkishinen 10 paıyzǵa qalyp kelemiz. Qazir oblysta 4 mln gektar dándi, 600 myń gektar maıly daqyldar jınaldy. Aldaǵy ýaqytta bul kórsetkish ulǵaıady. Egis maýsymy aıaǵyna deıin maıly daqyldardyń úlesin 700 myń gektarǵa deıin jetkizý josparda bar. Bul bizdiń oblys úshin jaqsy kórsetkish bolar edi», - dedi Arhımed Muhambetov.
Oblys basshysy qarasýlyqtarǵa astyqty artyq shyǵyn shyǵarmaı, ýaqytynda jınap alýdy tapsyrdy. Ákim sapary Qarasý aýdanynda jalǵasady.
