Qostanaı oblysynyń «altyn» jastary anyqtaldy
QOSTANAI. QazAqparat - Arhımed Muhambetov «Jastardyń altyn kitabyna» engen laýreattardy marapattady, dep habarlaıdy QazAqparat tilshisi.
«Jas Otan» JQ oblystyq fılıaly tóraǵasy Erlan Tóletaevtyń aıtýynsha, «Jastardyń altyn kitaby» alǵash ret 2005 jyly jaryq kórdi. 2010 jyly kitaptyń birinshi tomy aıaqtaldy. Osy ýaqytqa deıin úzdikter tizimine barlyǵy 184 laýreat engizilgen. Al bıyl 147 úmitker tirkelse, onyń 11-i ǵana laıyq dep tanyldy.
«Bul kitapqa jyl qorytyndysynda úzdik kórsetkishterge jetkenderdiń esimderin jazamyz. Sondaı-aq, muny jastardyń jeke kórsetkishteri dep qabyldamaǵan jón. Bul qoǵam aldyndaǵy jaýapkershilik sanalady, myńdaǵan adam altyn jastarǵa qarap boı túzeıdi. Aldaǵy ýaqytta da bıik belesterdi baǵyndyra berińizder!» - dedi oblys ákimi marapattaý rásimi kezinde.
Jyldyń taǵy bir ereksheligi - laýreattardyń klýby qurylmaq. Bul jastardyń erikti birlestigi bolady. Onda esimi qurmettelgen jandar óńirde qalyptasqan problemalardy birlesip talqylap, túrli máselelerdi sheshýde tıisti bastamalar kótermek.
«Keıde «Jastardyń altyn kitabyna» esimderi belgisiz adamdar kirip ketken dep synap jatady. Menińshe, bul durys emes. Ár salanyń myqty maıtalmandary bar. Olar óz isterine jaýapty. Bylaıǵy jurt olardy bile bermeýi múmkin. Erlik bir kúnde jasalmaıdy. Aty atalǵan kitapta jýrnalıstıka, sport, bilim men ǵylym, mádenıet, densaýlyq tárizdi atalymdar jeterlik», - deıdi oblystyq jastar isi jónindegi basqarma basshysy Kenesh Álimjanov.
