Qostanaı oblysynyń áleýmettik-ekonomıkalyq saladaǵy kórsetkishteri qandaı
QOSTANAI. QazAqparat – Qostanaı oblysy áleýmettik-ekonomıkalyq salada ozyq kórsetkishterge qol jetkizgen. Bul týraly Úkimet otyrysynda Premer-Mınıstr Asqar Mamın málimdedi,dep habarlaıdy QazAqparat.
Qostanaı oblysynyń ákimi Arhımed Muhambetov Úkimet basshysyna Qostanaı oblysynyń 2020 jylǵy qańtar-naýryzdaǵy áleýmettik-ekonomıkalyq damý qorytyndylary týraly málimdedi.
Aımaq ákiminiń sózinshe, jyl basynan beri bıýdjet tıimdi ıgerilip keledi. Áleýmettik-ekonomıkalyq damýdyń negizgi kórsetkishteri boıynsha ilgerileý baıqalady. Máselen, ónerkásip óndirisiniń kólemi 19,8%-ǵa, onyń ishinde óńdeý salasy – 26,4%, metallýrgııa – 29%, azyq-túlik 14%-ǵa ósken. Mundaı eleýli ósim nátıjesine mashına qurastyrý isi aıtarlyqtaı áser etip otyr. Bul salada óndiris 2,5 ese artty.
«Josparda – avtomobıl óndirisin 50 myń birlikke deıin qamtamasyz etý, bul 2019 jylǵydan shamamen eki ese joǵary. Sonymen qatar, sút ónimderin óndirý kólemi 6%-ǵa jáne ósimdik maıy óndirisi 2%-ǵa ulǵaıýyn kútýdemiz. Taý-ken salasynda temir-ken shıkizaty kólemin óndirýdi 11%-ǵa ósirýdi josparǵa qoıdyq. Sondaı-aq aýyl sharýashylyǵynda jalpy ónimniń naqty kólem ındeksi 102% deńgeıinde qalyptasty», – dedi Arhımed Muhambetov.
Qazirgi ýaqytta kóktemgi dala jumystaryna daıyndyq aıaqtalyp keledi. Oblys tuqym jáne janar-jaǵarmaımen tolyq qamtamasyz etilgen.
Qostanaı oblysynyń ekonomıkasyna ótken jylmen salystyrǵanda 8,7%-ke artyq ınvestıtsııa tartyldy. Óńirdiń taǵy bir jetistigi – qurylys jumystarynyń ósý qarqyny.
«Oryndalǵan qurylys jumystarynyń kólemi 8,4%-ǵa ósti, turǵyn úılerdi paıdalanýǵa berý 5,4%-ǵa ulǵaıdy. Barlyq negizgi kórsetkishter baqylaýda tur», – dedi Arhımed Muhambetov.
