Qostanaı oblysynyń ákimi jumysshylarǵa on úshinshi jalaqy berýdi júktedi
QOSTANAI. QazAqparat - Qostanaı oblysynyń ákimi Arhımed Muhambetovtiń tóraǵalyǵymen ótken selektorlyq otyrysta kásipkerlik jáne ındýstrıaldy-ınnovatsııalyq damytý basqarmasynyń esebi tyńdaldy, dep habarlaıdy QazAqparat.
Oblystaǵy ınvestıtsııalyq jobalardy júzege asyrý taqyrybynda kásipkerlik jáne ındýstrıaldy-ınnovatsııalyq damytý basqarmasynyń jetekshisi Murat Shaımov baıandama jasady.
«Búgingi tańda ındýstrıaldy-ınnovatsıalyq damý memlekettik baǵdarlamasynyń oryndalýy óńirde oń nátıje kórsetip otyr. Atap aıtqanda, ónerkásip óndirisiniń ústimizdegi jylǵy toǵyz aıyndaǵy kólemi 286,7 mlrd teńgeni qurady. Jyl saıyn oblysymyzda osy baǵdarlama aıasynda jańa óndiris oryndary paıdalanylýǵa beriledi. Sońǵy jeti jyl ishinde aımaqta 125 mlrd teńge bolatyn 84 joba júze asyp, shamamen 5 myńdaı turaqty jumys orny ashyldy. Osy baǵdarlama boıynsha júzege asyrylǵan jobalar 468 mlrd teńgeniń ónimin óndirdi. Qazirgi kezde 84 jobanyń 42-si Indýstrıaldyq kartadan shyǵaryldy, 36-sy turaqty túrde jumys isteıdi», - dedi Shaımov.
Onyń sózinshe, Qarabalyq aýdanynda broılerlik et óndirý jobasy toqtap tur. Qazir «Shańyraq» kompanııasymen kelissóz júrgizilýde. Áleýetti ınvestor joǵarydaǵy nysandy iske qosýdyń kartasyn jasady. Jospar boıynsha 2018 jyldyń tórtinshi toqsanynda alǵashqy ónim alynbaq. Sol sekildi Qostanaı qalasyndaǵy «Shemishke maıyn óndirýdi uıymdastyrý» jobasy da turalady.
«Qostanaı maı zaýytynyń» jobasy 2011 jyldan beri jumys istep keledi. Jobany ári qaraı júzege asyrýǵa joba berýshi múddeli bolmasa, onda komıssııa qurylyp, egjeı-tegjeıli tekserilgeni durys. Qolǵa alynǵan jumystar aıtylǵan merziminde iske asyrylýy tıis. Mundaı qatelik endi qaıtalanbasyn»- dedi oblys ákimi Arhımed Muhambetov.
Arhımed Muhambetov aımaqtyń barlyq eldi mekenderinde ótkiziletin is-sharalar óz deńgeıinde uıymdastyrylý qajettigin, dúkenderdegi azyq-túlik taýarlarynyń baǵalary qalypty bolýyn basa aıtty.
«Buǵan qosa, mekemeler men kásiporyndarda qyzmetkerlerdiń eńbek jalaqysy boıynsha qaryzdyń bolmaýy jón. Aıtýly merekelerge baılanysty on úshinshi jalaqy berý jaǵyn da qarastyryńyzdar», - dedi oblys ákimi.
