Qostanaı oblysynyń ákimi úzdik pedagogtardy marapattady
QOSTANAI.QazAqparat - E. Ómirzaqov atyndaǵy oblystyq fılarmonııada «Týǵan jer - Týǵan el":bilim berý júıesin damytý basymdylyǵy» taqyrybyndaǵy ǵylymı-praktıkalyq konferentsııa ótti.
Jıyn barysynda oblys ákimi jyldyń úzdik pedagogtaryn marapattady, dep habarlaıdy "QazAqparat" tilshisi.
Jıynǵa oblystyq máslıhattyń, ákimdiktiń, «Nur Otan» partııasy fılıalynyń ókilderi, basqa da múddeli memlekettik organdar, oblystyń joǵary oqý oryndarynyń rektorlary qatysty.
Óńir basshysy Arhımed Muhambetov bıyl «Týǵan jer» baǵdarlamasy boıynsha pedagogtardyń jemisti jumys istegenin aıtty.
«Búginde bilim men mádenıetti damytý aldyńǵy qatardaǵy sharýa ekeni sózsiz. Bilimniń damýy bizdiń eldiń álemdik arenadaǵy ornyn nyǵaıtýǵa septigin tıgizedi. Sondaı-aq, qoǵamnyń rýhanı turǵyda jańǵyrýy da ustazdarymyzdyń qolynda.Sol sebepti oblys pedagogtarynyń aldynda úlken mindetter tur», - dedi óńir basshysy.
Munan soń Arhımed Muhambetov jyldyń úzdik pedagogtaryn marapattaý rásimin ótkizdi.
«Ybyraı Altynsarın» tósbelgisimen Qostanaı qalasy bilim basqarmasy basshysynyń orynbasary Gúlsim Orazbaeva men Rýdnyı qalasy bilim basqarmasy basshysynyń orynbasary Natalıa Dlına marapattaldy. Áýlıekól óner mektebiniń oqytýshysy Saltanat Ospanovaǵa «QR bilim berý isiniń qurmetti qyzmetkeri» tósbelgisi tapsyryldy.
Bilim salasyn damytýǵa erekshe úles qosqan taǵy jeti pedagogqa «Ulaǵat» músinshesi jáne aqshalaı syılyq tabys etildi. Qostanaı oblysy bilim basqarmasynda jumys isteıtin 30 pedagog oblys ákiminiń gramotasyn aldy.
