Qostanaı oblysynyń ákimi sý qoımalary men bógetterdi tekserdi
QOSTANAI. QazAqparat - Qostanaı oblysynyń ákimi Arhımed Muhambetov Taran jáne Jitiqara aýdandaryndaǵy bóget jáne sý qoımalaryndaǵy jaǵdaıdy tekserdi, dep habarlaıdy QazAqparat tilshisi.
Taran aýdanynda ákim Aıat ózeniniń jaǵasynda salynyp jatqan bógetti baryp kórdi. Bógetti salýǵa oblys bıýdjetinen 116,4 mln teńge qarajat bólingen. Qurylys jumystary bıyl qazan aıyna qaraı bitýi tıis. Arhımed Muhambetov nysandy merziminde sapaly etip tapsyrý talabyn qoıdy.
Jitiqara aýdanynda úsh sý qoımasy bıyl kúrdeli jóndeledi. Joǵary Shortandy jáne Tómengi Shortandy sý qoımalaryn jóndeýge 154,4 mıllıon teńge
bólingen. Eki sý qoımasy da 1962 jyly paıdalanýǵa berilgen.
Óńir basshysynyń aıtýynsha, mamyrda jóndeý jumystary bastalady. Qalamen japsarlas ornalasqan sý qoımasyn jóndeý asa úlken jaýapkershilikti talap etedi.
Nysannyń merdiger uıymy jumystardy merziminde ári sapaly aıaqtaıtynyn jetkizdi. Merzim - 2018 jyldyń tamyzy.
Aıta keteıik, gıdrotehnıkalyq nysandardy jóndeýge oblys bıýdjetinen jalpy 317,7 mln teńge bólingen.
