Qostanaı oblysynyń ákimi koronavırýstan emdelip shyqty

QOSTANAI.QazAqparat – Qostanaı oblysynyń ákimi Arhımed Muhambetov koronovırýstan jazylyp shyqty. Bul týraly ol Instagram-daǵy paraqshasynda jazdy, dep habarlaıdy QazAqparat.

«Qurmetti qostanaılyqtar! Meniń COVID-19-ǵa tapsyrǵan analızim teris nátıje kórsetti jáne búginnen bastap jumysqa kiristim.

Óńir turǵyndaryn oblys aýmaǵynda engizilgen shekteý sharalaryn saqtaýǵa shaqyramyn. Barlyq dárigerlerge qıyn jaǵdaıda jumys istep jatqandary úshin alǵys aıtamyn! Barshańyzǵa zor densaýlyq jáne amandyq tileımin!», - dep jazdy óńir basshysy.

Buǵan deıin Qostanaı oblysynyń ákimi koronavırýs juqtyryp, oqshaýlanǵanyn habarlaǵan edik.