Qostanaı oblysynyń ákimi Arhımed Muhambetov tańdaýyn jasady
Daýys berýge óńir basshysy jubaıymen birge keldi. Ol tańdaýyn jasaǵan soń tilshilerge suhbat berdi. Jergilikti atqarýshy bıliktiń saılaýaldy birqatar sharalardy júzege asyrǵanyn jetkizdi. Oblysta 782 saılaý ýchaskesi ýaqytynda ashylǵan, onyń 21-i jabyq ýchaskeler. 1 mamyrdan bastap halyqaralyq baıqaýshylarǵa arnalǵan kómek kórsetý ortalyǵy jumys isteıdi.
«Búgin 352 saılaý ýchaskesinde anyqtamalyq pýnkter arnaıy ashylyp otyr. Ol óte yńǵaıly. Aımaǵymyzda 580 myńnan astam saılaýshy tizimde tur. Oblys jurtshylyǵy buǵan deıingi prezıdent, parlament saılaýlarynda joǵary belsendilik kórsetip keldi. Búgin de sol joǵary deńgeıde saıası naýqanǵa atsalysady degen senimim zor. Óńirimizde aýa raıy qolaıly, barlyq aýdandar men qalalarda kólikpen tasymaldaý máselesi sheshilgen. Osy turǵyda saılaý ádil, zań buzýsyz ótedi dep senemin», - dedi óńir basshysy.
Onyń aıtýynsha, EQYU tarapynan kelgen baqylaýshylar sany onnan asady, al TMD elderinen kelgen baqylaýshylar - jeteý. Bulardan bólek, barlyq partııalardyń, úkimettik emes uıymdardyń ókilderi jumylyp otyr. Ár ýchaskege 7-12 baqylaýshydan keledi.
Daýys berý barysyn qadaǵalaǵandardyń arasynda shvetsııalyq Rebekka Palmer de bar..
«Biz EQYU ókilderi retinde keldik. El boıynsha 300 baqylaýshy jumys istep jatyr. Ár oblysty qamtydyq. Negizi, uzaqmerzimdi baqylaýshylarymyz da bar, biraq, biz búgingi kúndegi saılaý barysyn qadaǵalaımyz», - dep atap ótti R.Palmer.
