Qostanaı oblysynyń ákimdigi turǵyndardy qabyldaýdy toqtatty
QOSTANAI. QazAqparat – Qostanaı oblysynyń ákimdigi azamattardy jeke suraqtary boıynsha qabyldaýdy ýaqytsha toqtatty, dep habarlaıdy QazAqparat.
«Elde tótenshe jaǵdaıdyń engizilýine baılanysty jáne azamattardyń ómiri men densaýlyǵyn saqtaý maqsatynda 2020 jylǵy 16 naýryzdan bastap 2020 jylǵy 15 sáýirge deıin Qostanaı oblysy ákiminiń, onyń orynbasarlarynyń jáne oblys ákimi apparaty basshysynyń jeke tulǵalardy jáne zańdy tulǵalardyń ókilderin qabyldaýy toqtatyldy», - dedi oblys ákiminiń baspasóz hatshysy Saıat Júsipov.
Alaıda turǵyndar oblys basshylyǵynyń atyna jazǵan ótinishterin QR Elektrondyq Úkimeti (ETsQ bolǵan jaǵdaıda) portalyna jiberedi nemese myna baılanys telefondary boıynsha habarlasa alady: 575-084, 575-057.
