Qostanaı oblysynyń 99 eldi mekenin sý basý qaýpi bar
QOSTANAI.QazAqparat – Qostanaı oblysy ózenderinde muz jarý jumystary jalǵasýda, dep habarlaıdy QazAqparat oblystyq TJD baspasóz qyzmetine silteme jasap.
Osy aptada Qostanaı oblysynda kún kúrt jylynyp, tasqyn sýdan tónetin qaýip kúsheıdi. Qyzyl sý birneshe óńirdi ábigerge salýy múmkin.
«Qazirgi kúni 99 eldi mekendi sý shaıyp ketýi múmkin. Oblystyń ońtústik, ortalyq jáne batys óńirlerinde qar jamylǵysy tolyq erigen. Ózen-kólderdegi sý deńgeıi joǵarylaǵan. Qutqarýshylar qaýipti degen aımaqtarda sý burý, aıdap shyǵarý jumystaryn qolǵa aldy. Táýlik boıy kezekshilik uıymdastyryldy. Oblys aýmaǵy eki ret áýe arqyly barlandy. Ózenderdegi muz jarý jumystary jalǵasýda. Bıyl jarylystar byltyrǵa qaraǵanda eki ese artyq oryndaldy», - deıdi TJD baspasóz qyzmetindegiler.
TJD Qarasý aýdanynyń sý aıdyndarynda qosymsha jarylys jumystaryn júrgizý týraly sheshim qabyldady. Buǵan temperatýranyń kúrt joǵarylaýy jáne egistikterdegi qar qorynyń jyldam erýi sebep.
Ótken demalys kúnderi Qarasý aýdanyndaǵy Qundyzdy ózeninde 6 jarylys jumysy ótkizildi.
