Qostanaı oblysynyń 7 aýdanynda kóppáterli turǵyn úı salynady
QOSTANAI. QazAqparat – Qostanaı oblysynda «Jumyspen qamtýdyń jol kartasy» baǵdarlamasyn iske asyrý aıasynda qurylys salasynda 5,1 mlrd teńgege 14 ınfraqurylymdyq joba iske asyrylady. Bul týraly oblys ákimdiginde ótken apparat májilisinde aıtyldy, dep habarlaıdy QazAqparat.
Oblystyq qurylys, sáýlet jáne qala qurylysy basqarmasynyń basshysy Berik Tańjaryqovtyń aıtýynsha, bıyl óńirde turǵyn úı salasy boıynsha 7 aýqymdy joba iske asyrylady.
«Jobalar Amangeldi, Denısov, Naýryzym, Fedorov, Jitiqara, Meńdiqara aýdandarynda qolǵa alyndy. Bul maqsatta 1, 1 mlrd teńge qarastyrylǵan. Onyń ishinde, Denısov aýdany Denısovka selosyndaǵyy ǵımaratty turǵyn úı etip qaıta salý úshin 101 mln teńge bólindi. «Ekspo Trans» JShS merdiger uıymy arqyly 29 mln teńge ıgerildi. Demontaj jumystary tolyǵymen oryndaldy, qabyrǵalaryn qalaý, terezelerdi ornatý boıynsha jumystar júrgizilýde. Nysan aldaǵy kúzde tapsyrylady. 119,6 mln teńge Amangeldi aýdanynyń Amangeldi aýylyndaǵy 18 páterli turǵyn úı ǵımaratyna jumsalady. Qazirdiń ózinde «Alıýmınstroı» JShS jóndeý jumystaryna 99,7 mln teńge ıgerdi. 484 mln teńge Jitiqara qalasyndaǵy 4 shaǵyn aýdannyń № 33 kóppáterli úıin qaıta salýǵa bólindi. Úı 2020 jylǵy jeltoqsan aıynda paıdalanýǵa beriledi», - deıdi Berik Tańjaryqov.
Bıyl Fedorov aýdanynda 24 páterli turǵyn úı salynady. Bul úıdiń boı kóterýi óńirdegi kadr tapshylyǵy máselesin sheshýge septigin tıgizedi. Sebebi, aýdanǵa keletin jas mamannyń basty suranysy – turǵyn úı. Nysannyń merdigeri – «Statýs Treıd» seriktestigi.
Qazir qurylysshylar 74,4 mln teńge jumsaǵan. Іrgetas bloktary men jertólelerdiń qabyrǵalaryn montajdaý boıynsha jumystar júrgizilýde.
