Qostanaı oblysynyń 2019 jylǵy bıýdjeti bekitildi
Kezekti sessııada 2019-2021 jyldarǵa arnalǵan oblys bıýdjeti qaıta qaraldy. Aldymen, oblystyq ekonomıka jáne bıýdjettik josparlaý basqarmasy basshysynyń orynbasary Janna Shaımardanovanyń baıandamasy tyńdaldy.
Onyń sózinshe, keler jyly óńirdegi barlyq salany ilgeriletýge qajetti qarjynyń esep-qısaby daıar.
«2019 jyly oblysty damytýǵa bıýdjetten 14 mlrd 789 mln teńge qarastyrylyp otyr. Onyń ishinde eń kóp qarjy, 3 mlrd teńge Áýlıekól aýdanyna tıesili. Eń azy, 799 mln teńge Lısakov qalasyna baǵyttaldy. Jalpy alǵanda, respýblıkalyq qazynadan 110,2 mlrd teńge qarajat bizdiń oblysqa quıylady. Atalǵan qarjynyń 5,5 mlrd teńgesi qyzmetkerlerdiń jalaqysyn kóterýge jumsalady», - dedi J. Shaımardanova.
Qostanaı oblysy basqarmalarynyń jumysyn jetildirýge 61 mlrd teńge bólinedi. Al taǵy 1 mlrd teńgege ishki ister organdaryna tehnıkalyq, tehnologııalyq jabdyqtar satyp alynady. Atap aıtqanda, 172 mln teńgege 26 qyzmettik kólik, 22 mln teńgege kompıýter jabdyqtary, 3 mln teńge sala qyzmetkerlerine ózara baılanys ustaýdy jetildiretin ámbebap nómir satyp alýǵa jumsalady. 50 mln teńge Qostanaıda ýaqytsha oqshaýlaý mekemesiniń qurylysyn jalǵastyrýǵa shyǵyndalady.
Tótenshe jaǵdaılar qyzmeti de nazardan tys emes. Bul salanyń materıaldyq-tehnıkalyq jabdyǵyna 290 mln teńge qarastyrylǵan. Onyń 238 mln teńgesine avarııalyq-qutqarý kólikteri, 26 mln teńgege arnaıy jabdyqtar,18 mln teńgesine órt sóndirý qurylǵylary ákelinbek. 8 mln teńge kóktem mezgilinde sý aıdyndarynda muz jarý jumystaryna, tasqyn qaýpiniń aldyn alýǵa bólinedi.
Máslıhat depýtattary oblystyń damýyna bólinetin qarajatty biraýyzdan maquldady.
