Qostanaı oblysyndaǵy jolda qar qursaýynda qalǵan júzden astam adam qutqaryldy
Qostanaı oblysynda demalys jáne mereke kúnderi 6 jáne 9 naýryz aralyǵynda aýa raıyna baılanysty erkertý jarııalanǵan. Osyǵan baılanysty óńirdegi joldara qutqarý jumysy júrgizildi.
«6 naýryzda tańǵy saǵat 10:50-de Borovskoı-Kaskad aýdandyq joldyń 24 shaqyrymynda eki adam qutqaryldy. Qarda qalǵan kólik joldyń tazartylǵan jaǵyna shyǵaryldy. Adamdar medıtsınalyq kómekti qajet etpedi. 7 naýryzda saǵat 20:45-te Arqalyqtyń №4 mamandandyrylǵan órt bólimshesine Arqalyq-Derjavınsk tasjolynyń 50 shaqyrymynda 60 jolaýshysy bar 20 avtokóliktiń jınalyp qalǵandyǵy týraly jedel habar tústi. 22:55-te jol talǵamaıtyn kóliktegi qutqarýshylar evakýatsııa ornyna kelip, 20 jolaýshyny qutqarǵan. Olardyń qatarynda segiz bala boldy. Qutqarylǵandar Arqalyqqa jetkizildi. Olardyń eshqaısysy jaraqat almaǵan jáne medıtsınalyq kómekti qajet etpegen», - dep habarlady TJD.
Qutqarýshylar 8 naýryz – mereke kúni de adamdardy evakýalııalady. Bul kúni Arqalyqtan 90 shaqyrym jerde Jezqazǵan-Petropavl tasjolynda qar qursaýynan bes adam qutqarylyp, eki tehnıka shyǵaryldy. Sonymen qatar Fýrmanovo aýylynyń mańynda «Jezqazǵan-Petropavl» respýblıkalyq jolynda qar qursaýynan 20 adam shyǵaryldy. Jolaýshylar Arqalyqqa ystyq tamaq beriletin jylytý pýnktine jetkizildi.
«9 naýryzda 1983 jylǵy azamatsha otbasymen birge Jetiqara-Chaıkovskıı tasjolynda turyp qalǵandyǵy týraly habarlady. Olarǵa jaqyn jerde taǵy bir adam jolda qalǵan. Qutqarýshylar jolaýshylardy aman-esen Jitiqara qalasyna jetkizdi. Taǵy da bul kúni Áýlıekól aýylynan 38 shaqyrym jerde «Áýlıekól-Moskalevka» avtojolynda tórt adam qutqaryldy», - dep málimdedi vedomstvoda.
Oblystyń TJD azamattardan aýa raıy qolaısyz kezde úıden shyqpaı, eldi mekenderden alys ketpeýin suraıdy.
