Qostanaı oblysyndaǵy jol apatynan eki aılyq sábı kóz jumdy
QOSTANAI. QazAqparat - 5 qyrkúıek kúni keshke shamamen saǵat 9 jarymda Jitiqara-Prıgorodnyı avtojolyndaǵy jol apaty týraly habarlama kelip tústi. Onda eki adam aýyr jaraqat alyp, eki aılyq sábı kóz jumdy, dep habarlady Qostanaı oblystyq ІІD baspasóz qyzmeti.
«Aldyńǵy kólikti basyp ozbaq bolǵan Prıgorodnyı aýylynyń 30 jastaǵy turǵyny Rover Honda Concerto kóligimen qarsy betke shyǵyp, «ÝAZ-ben» soqtyǵysty, - delingen habarlamada. - Qarsy kelgen júk kóligin 44 jastaǵy jeke fırma qyzmetkeri júrgizgen».
Jol-kólik apatynan «Honda» jolaýshylary - 54 jáne 30 jastaǵy eki áıel túrli jaraqat alyp, Jitiqara aýdandyq ortalyq aýrýhanasyna jatqyzyldy. Sonymen birge avtokólikte bolǵan eki aılyq sábı aýrýhanaǵa jetpeı kóz jumdy.
Qazirgi ýaqytta qajetti saraptamalar taǵaıyndalyp, QR QK-niń 345-baby, 3-bólimi («Jolda júrý erejelerin buzý») boıynsha sotqa deıingi tergeý jumystary bastaldy.
