Qostanaı oblysyndaǵy jataqhanalardyń áleýmettik-turmystyq jaǵdaıy tekserildi

QOSTANAI.QazAqparat – «Jas Otan» JQ oblystyq fılıaly «Qostanaı – adaldyq alańy» jobalyq keńsesimen birigip, JOO men kásiptik bilim mekemeleriniń jataqhanalaryna monıtorıng júrgizdi, dep habarlaıdy QazAqparat tilshisi.

«Jas Otan» JQ oblystyq fılıalynyń tóraǵasy Abaı Júsipovtiń aıtýynsha, Qostanaıdaǵy jataqhanalar jyl saıyn tekserilip otyrady. Basty sebep – bilim alýshylarǵa tıisti jaǵdaılardyń jasalýy, qaýipsizdik sharalary men gıgıenalyq talaptardyń saqtalýy. Qazir aımaqta 35 stýdenttik jataqhana bar. Solardyń biri – Z.Aldamjar atyndaǵy Qostanaı ýnıversıtetiniń jataqhanasyna 300-den astam stýdent qabyldanǵan. Jataqhana oryndary aldymen oblys ortalyǵynan shalǵaı aýyldardan kelgenderge beriledi.

Reıd barysynda monıtorıng tobynyń músheleri olqylyqtardyń bar-joǵyn qadaǵalady. Tósek-oryn men jýynatyn bólmeniń tazalyǵynan bastap órtke qarsy dabyl qurylǵysynyń sapaly jumys isteýi arnaıy toptyń baqylaýynda boldy.

«Elbasynyń bes áleýmettik bastamasynda aıtylǵan mindetterge sáıkes, stýdentterdiń turmys sapasyn jaqsartýdy partııa tikeleı baqylaýyna aldy. Qazir jataqhanada 1-shi kýrs stýdentteri ǵana turyp jatyr. Al qalǵan bilim alýshylar qashyqtan oqýda. Barlyq sanıtarlyq talaptar saqtalǵan. Kún saıyn dızenfektsııa jasalady. Jataqhanalardyń qazirgi áleýmettik-turmystyq deńgeıine kóńil tolady. Shalǵaı aýyldarda ǵalamtorǵa qosyla almaıtyn stýdentter arnaıy laboratorııalyq, dıplomdyq jumys jazýǵa daıyndyqty bastady», - deıdi Abaı Júsipov.