Qostanaı oblysyndaǵy jańa qalanyń ataýy qandaı bolady
QOSTANAI. QazAqparat - Qostanaı oblysyndaǵy Zatobol kentiniń ataýyn ózgertý týraly usynysty respýblıkalyq onomastıkalyq komıssııa qoldady, dep habarlaıdy QazAqparat tilshisi.
Oblystyq máslıhattyń kezekten tys sessııasynda óńir basshysy Arhımed Muhambetov Qostanaı oblysynda taǵy da bir qala paıda bolýy múmkin ekenin aıtqan edi.
Keıin Zatobol kentinde osy eldi mekenge qala mártebesin berý jáne atyn ózgertý máselesine arnalǵan jergilikti qoǵamdastyqtyń jınalysy ótkizildi. Turǵyndar bul usynysty tolyqtaı qoldaǵan-dy.
Oblystyq tilderdi damytý basqarmasynyń basshysy Gúljan Meńdekınova málim etkendeı, aldaǵy ýaqytta Zatobol kentiniń ataýy ózgermek.
«2018 jylǵy 9 qarashadaǵy respýblıkalyq onomastıkalyq komıssııanyń qorytyndysy boıynsha Qostanaı aýdanynyń Zatobol kentin Tobyl qalasy dep qaıta ataý týraly oblys ákimdiginiń usynysy maquldandy. Qazirgi ýaqytta qujattar Úkimet qaraýynda jatyr», - dedi ol.
Sondaı-aq, Taran aýdanyn Beıimbet Maılın atyndaǵy aýdan dep ataý usynysy Úkimet qaraýyna jiberildi.
