Qostanaı oblysyndaǵy jańa qala qalaı damymaq
QOSTANAI. QazAqparat - Qostanaı oblysyndaǵy besinshi qala - Tobylda jańa shaǵynaýdandar boı kóteredi. Bul týraly óńir basshysy Arhımed Muhambetovtiń qatysýymen ótken jıynda málim etildi, dep habarlaıdy QazAqparat.
Eske salsaq, Qostanaı oblysyndaǵy Zatobol kentinde osy eldi mekenge qala mártebesin berý jáne atyn ózgertý máselesine arnalǵan jergilikti qoǵamdastyqtyń jınalysy ótken edi. Sol jıynda Qostanaı aýdany ákiminiń orynbasary Bolat Bekenov elimiz kartasynda jańa Tobyl qalasy paıda bolatynyn aıtqan bolatyn.
Qostanaı aýdanynyń ákimi Qaırat Ahmetovtiń sózinshe, qazirgi Zatobol kentiniń damýy úshin áli birneshe áleýmettik nysan turǵyzý qajet.
«Búginde aýdandaǵy 70 myńnan astam adamnyń teń jartysy Zatobol, Zarechnyı jáne Mıchýrın aýyldarynda turady. Atalǵan eldi mekenderdegi 135 shaqyrym joldyń 96 shaqyrymy jóndeýdi qajet etedi. Bıyl osy maqsatta 500 mln teńge qarastyryp otyrmyz. Jyl saıyn jaıaý júrginshiler jolyn salýǵa 35 mln teńge bólý kerek. 2021 jylǵa deıin barlyq kóshege jaryqshamdar ornatylady. Oǵan bıýdjetten 188,5 mln teńge bólinedi», - dedi Qaırat Ahmetov óz baıandamasynda.
Oblys ákimi Arhımed Muhambetov jol jóndeýge baǵyttalǵan qarjyny qoldaıtynyn jetkizdi. Sondaı-aq, ol tasjoldy resaıklıng ádisimen qalypqa keltirýdi usyndy. Arhımed Muhambetov aıtqandaı, sońǵy úsh jylda resaıklıng ádisimen 100-den astam kóshe jóndelgen.
Bıyl bolashaq Tobyl qalasynda birneshe shaǵynaýdan paıda bolady. Buǵan qosa «Severnyı» shaǵynaýdanynda qurylysy bastalǵan 11 kópqabatty úı halyq ıgiligine berilmek.
«Qazirgi ýaqytta «Severnyıǵa» qajetti ınfraqurylym - gaz, sý, elektr jaryǵy ótkizilgen. Mundaǵy 8 úı nesıelik baǵytta, qalǵan 3 úı jergilikti atqarýshy organdar qyzmetkerlerine tapsyrylady. Jańadan boı kóteretin «Báıterek» jáne «Astana» shaǵynaýdandarynda 72 kópqabatty úı turǵyzylady», - dedi aýdan ákimi.
Arhımed Muhambetov Zatobol kentindegi eski ǵımarattardy synǵa aldy. Onyń sózinshe, tozyǵy jetken qurylys oryndary bolashaq qalanyń damýyna aıtarlyqtaı kedergi keltiredi.
«Birinshiden, ǵımarattar qalanyń kórki desek, ony retke keltirýdi tez arada qolǵa alyńyzdar. Damýdy tejeıtin faktordyń biri osy. Áýeli, turǵyn úılerdiń qasbetin durystańyzdar. Úılerdiń syrty bir tústi bolsyn. Aýdan ortalyǵynda zańsyz salynyp jatqan qurylys nysandary bar. Mundaı olqylyqqa jol berýge bolmaıdy. Iesiz turǵan ǵımarattardy paıdalanbasańyzdar, memlekettiń menshigine ótkizý qajet», - dep eskertý jasady óńir basshysy.
Oblys ákimi aýdan ortalyǵynda sport alańdaryn kóbirek salýdy tapsyrdy. A.Muhambetov memlekettik qyzmetshilerge jańa ǵımarat salý týraly aýdan ákiminiń usynysyn qoldaǵan joq.
