Qostanaı oblysyndaǵy týbdıspanserdiń bas dárigeri para alǵan
QOSTANAI.QazAqparat – Qostanaı qalasynyń № 2 sotynda «Qostanaı oblystyq týberkýlezge qarsy dıspanseri» KMQK bas dárigerine qatysty qylmystyq is qaraldy, dep habarlaıdy QazAqparat oblystyq sottyń baspasóz qyzmetine silteme jasap.
Sot týbdıspanser basshysyn QR QK 336-baby, 2-tarmaǵy (para alý) boıynsha aıypty dep tanydy. Sondaı-aq sotta qylmystyq kodekstiń 367 jáne 368-baptarymen aıyptalǵan medıtsınalyq mekemeniń bas esepshisi men JShS basshysyna qatysty is qaraldy.
«Sot bas býhgalter B.-nyń bas dáriger M.-nyń usynysy boıynsha K.-men kelisip, jergilikti JShS-ǵa medıtsınalyq buıymdar men qorǵanys quraldaryn satyp alý boıynsha 236 000 teńge tenderde kómek kórsetýge ýaǵdalasqanyn anyqtady. QR QK-niń 366, 367, 368-baptarynyń sanktsııalary aıyppul túrindegi jazany kózdeıdi. Osyǵan baılanysty M.-ǵa – 11 800 000 teńge, B.-ǵa – 2 360 000 teńge, K.-ǵa – 4 720 000 teńge aıyppul taǵaıyndaldy. Barlyǵy ómir boıy memlekettik qyzmette jumys isteý quqyǵynan aıyryldy», delingen sottyń baspasóz habarlamasynda.
