Qostanaı oblysyndaǵy sý basqan Sýrıkovka kentinde uzyndyǵy 2 shaqyrym bóget salyndy (FOTO)
ASTANA. QazAqparat - Qostanaı oblysyndaǵy sý basqan Sýrıkovka kentinde uzyndyǵy 2 shaqyrym bóget salyndy. Bul týraly QR ІІM Tótenshe jaǵdaılar boıynsha komıtetiniń resmı ókili Rýslan Imanqulv habarlady.
«Shıshıkın aýyldyq okrýginiń Sýrıkovka kentinde TJ-ny joıý boıynsha jedel shtab uıymdastyryldy.
Sý basqan jerge QR ІІM TJ boıynsha komıtetiniń kúshteri men qurylymdary jiberildi. 2016 jylǵy 15 sáýirdegi saǵat 09:00-degi jaǵdaı boıynsha, kentte 20 úı, 5 aýlany sý basqan. 55 adam, sonyń ishinde 15 bala men 7 zeınetker qaýipsiz jerge shyǵaryldy, sonyń ishinde 21 adam Sýrıkovka bastaýysh mektebinde ornalastyryldy. 152 bas iri qara mal, 2 bas usaq mal, 135 shoshqa, 4 jylqy qaýipsiz jerge aıdaldy», - delingen habarlamada.
Evakýatsııalanǵandar Sýrıkovka orta mektebinde jáne týystarynyń úıinde ornalastyryldy, zardap shekkender jáne TJ ornynda jumys istep jatqandar úshin tamaq beriletin oryndar uıymdastyrylǵan.
Vedomstvonyń aqparatynsha, Qostanaı aýdandyq ІІB-niń qyzmetkerleri qoǵamdyq tártip pen turǵyndardyń materıaldyq qundylyqtaryn qorǵaý beketteri qoıyldy. Qutqarýshylar qaıyqtarmen táýlik boıy patrýldeý uıymdastyrdy, qosymsha jaryq berildi.
«2016 jylǵy 14 sáýirdegi saǵat 23:00-degi jaǵdaı boıynsha uzyndyǵy 2 shaqyrymǵa jýyq bóget salyndy, eldi mekenge sý kelýi toqtaldy. TJ-ny joıý jumystaryna 95 adam men 37 tehnıka qatysýda», - dep atap ótildi habarlamada.
