Qostanaı oblysyndaǵy órt: Semeıden arnaıy ınjenerlik tehnıkalar jiberildi

NUR-SULTAN. QazAqparat – Qostanaı oblysynyń Áýlıekól aýdanyndaǵy órtti sóndirý úshin Semeı qalasynan arnaıy ınjenerlik tehnıkalar jiberildi. Bul týraly Abaı oblysy ákimdiginiń baspasóz qyzmetinen málim etti, dep habarlaıdy QazAqparat tilshisi.

«Qarýly kúshterdiń arnaıy ınjenerlik tehnıkasy Semeı qalasynan Qostanaı oblysyna órtti joıý úshin kómekke shyqty», - delingen atalǵan óńir ákimdiginiń baspasóz qyzmeti taratqan habarlamada.

Ákimdik dereginshe, Abaı oblysy aýmaǵandaǵy «AMANAT» partııasynyń fılıaldarynda 9 gýmanıtarlyq kómek qabyldaý pýnktileri ashylǵan.

Eske salsaq, 2 qyrkúıekte saǵat 15:10-da Qostanaı oblysyndaǵy Qazanbasy aýylynan 20 shaqyrym jerde, «Basaman KShSh» KMM aýmaǵynda orman alqaby órtengen bolatyn. Tótenshe jaǵdaılar mınıstri ıÝrıı Ilın oqıǵa ornyna tikushaqpen attandy.

Órt aýyldarǵa qaraı jalyndap, turǵyndar evakýatsııalandy, órtke baılanysty shuǵyl jeli iske qosyldy.

Prezıdent Qasym-Jomart Toqaev Premer-Mınıstr Álıhan Smaıylov, Tótenshe jaǵdaılar mınıstri ıÝrıı Ilın jáne Qostanaı oblysynyń ákimi Arhımed Muhambetovtyń órt aımaǵyndaǵy jedel jaǵdaı týraly esebin tyńdady.

Tótenshe jaǵdaılar mınıstri ıÝrıı Ilınniń málimeti boıynsha, Qostanaı oblysy Áýlıekól aýdanyndaǵy órt 43 myń gektardan astam aýmaqty sharpyǵan. Amanqaraǵaı aýylynda 98 úı órtenip ketti. 10 adamdy ortasha deńgeıde kúıik shalǵan jáne ýlanǵan. Sondaı-aq, Amanqaraǵaı aýylynda bir adamnyń máıiti tabyldy.

QR Premer-Mınıstri Álıhan Smaıylov Qostanaı oblysyndaǵy alapat tabıǵı órtterdiń saldaryn joıý máseleleri boıynsha jedel keńes ótkizdi.

Óńirlerde «AMANAT» partııasynyń gýmanıtarlyq kómek qabyldaý pýnktileri jumysyn bastady.

Vıdeodan alynǵan kadr